തിരുവനന്തപുരം
മാധ്യമ വാർത്തകൾ മാത്രം ആധാരമാക്കി കീഴ് ജീവനക്കാർക്കെതിരേ അച്ചടക്ക നടപടിയെടുക്കരുതെന്ന് ജില്ലാ പൊലിസ് മേധാവിമാർക്ക് സംസ്ഥാന പൊലിസ് മേധാവിയുടെ നിർദേശം. മുൻപും ഇത് സംബന്ധിച്ച് നൽകിയ നിർദേശങ്ങൾ പാലിക്കുന്നില്ലെന്നും ഡി.ജി.പി അനിൽ കാന്ത് ചൂണ്ടിക്കാട്ടി. മാധ്യമങ്ങളിൽ വരുന്ന ആരോപണങ്ങൾ ശരിയാണെന്ന് പ്രാഥമിക അന്വേഷണത്തിൽ തെളിയാതെ പൊലിസുകാർക്കെതിരേ അച്ചടക്ക നടപടി സ്വീകരിക്കരുതെന്നാണ് ഡി.ജി.പി നൽകിയ നിർദേശം. ക്രമസമാധാനപാലനത്തിനിടെ പൊലിസ് നടപടിയിൽ പ്രകോപിതരായി ചിലർ ഓൺലൈൻ മാധ്യമങ്ങളിലെ സ്വാധീനം ഉപയോഗിച്ച് തെറ്റായ വാർത്തകൾ പടച്ചുവിടുന്നുണ്ടെന്നും ഇതിന്റെ അടിസ്ഥാനത്തിൽ അച്ചടക്ക നടപടിക്ക് ഇരയാവുന്നുവെന്നുമുള്ള പൊലിസ് ഉദ്യോഗസ്ഥരുടെ പരാതിയെ തുടർന്നാണ് ഡി.ജി.പിയുടെ ഇടപെടൽ.

'ചില സന്ദർഭങ്ങളിൽ ജനരോഷം കണക്കിലെടുത്താണ് നടപടിയുണ്ടാകുന്നത്. ഇത്തരം സന്ദർഭങ്ങളിൽ ശരിയായ നടപടിക്രമങ്ങളോ, അന്വേഷണങ്ങളോ ഉണ്ടാകാറില്ല. പ്രാഥമിക അന്വേഷണത്തിൽ കുറ്റം തെളിഞ്ഞാൽ ചട്ടപ്രകാരം നടപടി എടുക്കണം' -അനിൽ കാന്ത് വ്യക്തമാക്കി. പൊലിസ് സേനയിൽ അച്ചടക്ക നടപടി നേരിടുന്ന ഉദ്യോഗസ്ഥനെ സ്ഥാനക്കയറ്റത്തിന് പരിഗണിക്കാറില്ല. ക്രമക്കേട് നടത്തിയ ഉദ്യോഗസ്ഥനെ ക്രിമിനലായി പരിഗണിക്കില്ലെങ്കിലും, പല ശിക്ഷാ മുറകളും സേനയ്ക്കുള്ളിൽ തന്നെ ലഭിക്കാറുണ്ട്. ഫൈൻ, അധിക ഡ്യൂട്ടി, ഡ്രിൽ, കഠിനമായ ട്രെയിനിങ്ങുകൾ, നാശനഷ്ടങ്ങൾക്കുള്ള തുക ശമ്പളത്തിൽ നിന്ന് ഈടാക്കുക തുടങ്ങി നിരവധി ശിക്ഷാ മുറകളുണ്ട്. പ്രാഥമിക അന്വേഷണം നടത്തി കുറ്റക്കാരനെന്ന് കണ്ടാൽ മാത്രമേ ഇത്തരം ശിക്ഷ വിധിക്കാൻ പാടുള്ളൂവെന്നാണ് പൊലിസ് മേധാവി നിർദേശം നൽകിയിരിക്കുന്നത്.