പാലക്കാട്: മുതിര്‍ന്ന കോണ്‍ഗ്രസ് നേതാവ് കെ. ശങ്കരനാരായണന്‍ അന്തരിച്ചു. 90 വയസ്സായിരുന്നു. വാര്‍ധക്യ സഹജമായ അസുഖങ്ങളെ തുടര്‍ന്നായിരുന്നു അന്ത്യം. ആറ് സംസ്ഥാനങ്ങളില്‍ ഗവര്‍ണര്‍ ആയിരുന്നു. ആന്റണി മന്ത്രി സഭയില്‍ ധനകാര്യമന്ത്രിയായിരുന്നു അദ്ദേഹം. പാലക്കാട്ടെ വീട്ടിലായിരുന്നു അന്ത്യം. യു.ഡിഎഫ് മുന്‍ കണ്‍വീനറായിരുന്നു

ശങ്കരന്‍ നായരുടേയും ലക്ഷ്മിയമ്മയുടേയും മകനായി 1932 ഒക്ടോബര്‍ 15ന് പാലക്കാട് ജില്ലയിലെ ഷൊര്‍ണൂരില്‍ ജനിച്ചു. വിദ്യാര്‍ഥിയായിരുന്ന കാലഘട്ടത്തില്‍ തന്നെ രാഷ്ട്രീയത്തില്‍ പ്രവേശിച്ചു. 1946ല്‍ സ്റ്റേറ്റ് കോണ്‍ഗ്രസിന്റെ വിദ്യാര്‍ത്ഥി വിഭാഗമായിരുന്ന സ്റ്റുഡന്‍സ് ഓര്‍ഗനൈസേഷന്റെ പ്രവര്‍ത്തകനായിരുന്നു പിന്നീട് കോണ്‍ഗ്രസ് പാര്‍ട്ടിയില്‍ ചേര്‍ന്നു സജീവ രാഷ്ട്രീയ പ്രവര്‍ത്തകനായി മാറി.

ആറ് സംസ്ഥാനങ്ങളിലെ ഗവര്‍ണര്‍ പദവി വഹിച്ച ഏക മലയാളിയാണ് ശങ്കരനാരായണന്‍. അരുണാചല്‍ പ്രദേശ് (04/09/2007 26/01/2008), അസം (26/06/2009 27/07/2009), നാഗാലാന്‍ഡ് (03/02/2007 28/07/2009), ജാര്‍ഖണ്ഡ് (26/07/2009 21/01/2010), ഗോവ (അധികചുമതല) (27/08/2011 04/05/2012), മഹാരാഷ്ട്ര (22/01/2010 24/08/2014) എന്നീ സംസ്ഥാനങ്ങളില്‍ ഗവര്‍ണര്‍ പദവി വഹിച്ചിട്ടുണ്ട്.ഭാര്യ : രാധ ഏകമകള്‍ : അനുപമ. ആത്മകഥ: അനുപമം ജീവിതം.