റിയാദ്: സഊദിയിൽ 50 വയസിനു മുകളിലുള്ളവർക്ക് കൊവിഡ് വാക്സിൻ രണ്ടാം ബൂസ്റ്റർ പ്രഖ്യാപിച്ചു. ആദ്യ ബൂസ്റ്റർ ഡോസ് എടുത്ത് 8 മാസം പൂർത്തിയാക്കിയ അമ്പത് വയസ് മുതലുള്ളവർക്കാണ് നാലാം ഡോസ് അഥവാ രണ്ടാം ബൂസ്റ്റർ ഡോസ് നൽകുന്നത്.

ഈ വിഭാഗങ്ങൾക്ക് സ്വിഹത്തി ആപ് വഴി അപ്പോയിന്റ്റ്മെന്റ് എടുക്കാമെന്ന് സഊദി ആരോഗ്യമന്ത്രാലയം അറിയിച്ചു.

കൊവിഡ് പ്രതിരോധ രംഗത്ത് ഏറെ മുന്നിലുള്ള സഊദിയിൽ ഇതിനോടകം 6,41,76,983 ഡോസ് വാക്സിൻ വിതരണം പൂർത്തിയായിട്ടുണ്ട്. ഇതിൽ 2,64,19,627 ഒന്നാം ഡോസും 2,47,54,636 രണ്ടാം ഡോസുമാണ്. 1,30,02,720 ഒന്നാം ബൂസ്റ്റർ ഡോസ് വാക്സിനും വിതരണം ചെയ്തുകഴിഞ്ഞു.