മറുനാടന്‍ മലയാളിക്കെതിരെ യൂസഫലിയുടെ വക്കീല്‍ നോട്ടിസ്

കൊച്ചി: വ്യാജ വാര്‍ത്ത നല്‍കിയെന്നാരോപിച്ച് ഓണ്‍ലൈന്‍ പോര്‍ട്ടലിനെതിരെ 10 കോടി രൂപ മാനനഷ്ടം ആവശ്യപ്പെട്ട് ലുലു ഗ്രൂപ്പ് എംഡി എം.എ യൂസഫലിയുടെ വക്കീല്‍ നോട്ടിസ്. പോര്‍ട്ടലിന്റെ മറുനാടന്‍ മലയാളി ഉടമ സാജന്‍ സക്കറിയക്കെതിരേയാണ് തന്നെ അപകീര്‍ത്തിപ്പെടുത്താന്‍ ശ്രമിച്ചെന്നാരോപിച്ച് എം.എ യൂസഫലി വക്കീല്‍ നോട്ടീസ് അയച്ചത്.
യൂട്യൂബ് ചാനലിലൂടെ മാര്‍ച്ച് ആറിന് പുറത്തുവിട്ട വീഡിയോയുടെ അടിസ്ഥാനത്തിലാണ് വക്കീല്‍ നോട്ടിസ് അയച്ചത്. സാജന്‍ തന്നെയാണ് യൂസഫലിക്കെതിരെ ആരോപണം ഉന്നയിച്ചത്. യൂസഫലി സ്വന്തം ഭാര്യയെ സ്‌പെഷ്യല്‍ മാരേജ് ആക്ട് പ്രകാരം വീണ്ടും വിവാഹം കഴിച്ചുവെന്നായിരുന്നു ആരോപണം.

ഏക സിവില്‍ കോഡ് ആവശ്യമാണെന്നാണ് യൂസഫലിയും ഷുക്കൂര്‍ വക്കീലും പറയുന്നതെന്നും വീഡിയോയുടെ ആമുഖത്തില്‍ സൂചിപ്പിച്ചിരുന്നു. എന്നാല്‍ ഇത് വാസ്തവവിരുദ്ധമായ കാര്യമാണെന്നും തന്നെ മനഃപൂര്‍വം അപകീര്‍ത്തിപ്പെടുത്താന്‍ വേണ്ടിയാണ് ഇത്തരമൊരു പ്രസ്താവന നടത്തിയതെന്നും യൂസഫലി പറഞ്ഞു.
വീഡിയോ പുറത്ത് വന്നതോടെ തനിക്കും ലുലു ഗ്രൂപ്പിനും ഉണ്ടായ ബുദ്ധിമുട്ടുകളും ചൂണ്ടിക്കാണിച്ചിട്ടുണ്ട്. നോട്ടീസ് ലഭിച്ചാല്‍ ഏഴ് ദിവസത്തിനുള്ളില്‍ ഖേദം പ്രസിദ്ധീകരിക്കണമെന്നാണ് ആവശ്യം. ഇതിനുപുറമെ നഷ്ടപരിഹാരം നല്‍കുന്നതില്‍ വീഴ്ച വരുത്തിയാല്‍ സിവില്‍, ക്രിമിനല്‍ നടപടികള്‍ ആരംഭിക്കുമെന്നും വക്കീല്‍ നോട്ടീസില്‍ പറയുന്നു.