കൊച്ചി: മെട്രോയുടെ നിര്‍മാണ പ്രവര്‍ത്തനങ്ങള്‍ സ്തംഭനത്തിലേക്ക്. മാഹാരാജാസ് മുതല്‍ എറണാകുളം സൗത്ത് വരെയുള്ള നിര്‍മാണ പ്രവര്‍ത്തികള്‍ക്കുള്ള റീടെന്‍ഡറില്‍ നിന്ന് വിട്ടുനില്‍ക്കാന്‍ കരാറുകാര്‍ തീരുമാനിച്ചു. കൂടുതല്‍ നഷ്ടം ഉണ്ടാക്കുന്നതിനാലാണ് കരാറുകാരുടെ പിന്മാറ്റം.

എല്‍ ആന്‍ഡ് ടിയും സോമയുമാണ് മെട്രോയുടെ പ്രധാന കരാറുകാര്‍. കൊച്ചി മെട്രോയും കലൂര്‍ മുതല്‍ എറണാകുളം സത്ത് വരെയുള്ള നിര്‍മാണപ്രവൃത്തി കരാറെടുത്തിരിക്കുന്ന സോമയാണ് റീടെന്‍ഡറില്‍ നിന്ന് വിട്ടുനില്‍ക്കാന്‍ തീരുമാനിച്ചത്. കരാര്‍ കാലാവധിക്കുള്ളില്‍ നിര്‍മാണം പൂര്‍ത്തിയാകാത്തതിന് എല്‍ ആന്‍ഡ് ടിയില്‍ നിന്നും സോമയില്‍ നിന്നും പ്രതിദിനം യഥാക്രമം 20 ലക്ഷവും 14 ലക്ഷവുമാണ് ഈടാക്കുന്നത്. പിഴയിനത്തില്‍ സോമയ്ക്ക് 30 കോടിയും എല്‍ ആന്‍ഡ് ടിക്ക് 100 കോടിയും നഷ്ടം ഇതിനോടകം സംഭവിച്ചിട്ടുണ്ട്.

മഹാരാജാസ് മുതല്‍ സൗത്ത് വരെയുള്ള സോമയുടെ നിര്‍മാണപ്രവര്‍ത്തനത്തില്‍ വലിയ യന്ത്രസമഗ്രികളുടെ പ്രവര്‍ത്തനത്തിന് രാത്രിമാത്രമാണ് അനുമതി. ഇത് പ്രവൃത്തിയുടെ വേഗതയെ കാര്യമായി ബാധിക്കുന്നു. കൂടാതെ മെട്രോയ്ക്കായുള്ള സ്ഥലമേറ്റെടുപ്പ് നടപടികള്‍ വൈകുന്നതും ഡി.എം.ആര്‍.സിയുടെ വീഴ്ചയായി കരാറുകാര്‍ ചൂണ്ടിക്കാട്ടുന്നു.

പുതിയ സാഹചര്യത്തില്‍ നിരക്ക് കൂട്ടിത്തരണമെന്ന ആവശ്യം തള്ളിയതോടെ നിര്‍മാണം തുടരാനാവില്ലെന്ന് സോമ അറിയിച്ചു. ഇതോടെയാണ് റീ ടെന്‍ഡര്‍ ചെയ്യാന്‍ ഡി.എം.ആര്‍.സി തീരുമാനിച്ചത്. എന്നാല്‍, റീടെന്‍ഡറില്‍ നിന്നുള്ള സോമയുടെ പിന്മാറ്റം മറ്റു കമ്പനികളുടെ നിസ്സകരണത്തിന് കാരണമായി. ഇതോടെ മെട്രോ നിര്‍മാണം പ്രതിസന്ധിയിലാകുമെന്ന് ഉറപ്പായി.