കായംകുളം: കോണ്‍ഗ്രസ് നേതാവിന്റെ വീട്ടില്‍ മോഷണം നടത്തിയതിന്റെ തിരക്കഥ ഒരുക്കിയത് യൂത്ത് കോണ്‍ഗ്രസ് നേതാവെനന്് പൊലിസ്. സംഭവത്തില്‍ യൂത്ത് കോണ്‍ഗ്രസ് മുന്‍ നേതാവും കുപ്രസിദ്ധ മോഷ്ടാവും വലയിലായി. ദിവസങ്ങളായി നേതാവും കുടുംബവും കൊല്ലത്തെ ആശുപത്രിയില്‍ ചികിത്സയില്‍ ആണെന്നറിഞ്ഞായിരുന്നു കൃത്യം നടപ്പാക്കിയത്.
യൂത്ത് കോണ്‍ഗ്രസ് കായംകുളം മണ്ഡലം സെക്രട്ടറിയായിരുന്ന സഫറുദ്ദീന്‍, സ്‌പൈഡര്‍ സുനില്‍ എന്ന സുനില്‍ എന്ന മോഷ്ടാവിനെയുമാണ് കായംകുളം പോലിസ് അറസ്റ്റ് ചെയ്തത്.

കോണ്‍ഗ്രസ് മുന്‍ ജില്ലാ കമ്മിറ്റി അംഗം കൃഷ്ണപുരം കറുകതറയില്‍ കെ.എം.ബഷീറിന്റെ വീട് കുത്തിതുറന്ന് നടത്തിയ മോഷണത്തിലാണ് ഇരുവരും പിടിയിലായത്. കഴിഞ്ഞ ജൂണ്‍ 25നായിരുന്നു സംഭവം. ദിവസങ്ങളായി ബഷീറും കുടുംബവും കൊല്ലത്തെ ആശുപത്രിയില്‍ ചികിത്സയില്‍ ആയിരുന്നു. ഇതിനാല്‍ വീട്ടില്‍ ആരും ഉണ്ടായിരുന്നില്ല.

ബഷീറിന്റെ ബന്ധു വീട് തുറക്കാന്‍ നോക്കിയപ്പോഴാണ് മോഷണ വിവരം അറിയുന്നത്. മുന്‍ വാതില്‍ തുറക്കാന്‍ ശ്രമിച്ചപ്പോള്‍ അകത്ത് നിന്ന് കുറ്റിയിട്ട നിലയിലായിരുന്നു. തുടര്‍ന്ന് അടുക്കള വാതില്‍ കുത്തിത്തുറന്നതായി ശ്രദ്ധയില്‍പ്പെട്ടു. വീടിന്റെ അലമാര പൊളിച്ച നിലയിലായിരുന്നു. പോലിസ് അന്വേഷണത്തിലാണ് പ്രതികളെ പിടികൂടാനായത്.