'സ്പീക്കറുടെ പേര് ഗോഡ്‌സെ എന്നാണെങ്കില്‍ സുരേന്ദ്രന്‍ കെട്ടിപ്പിടിച്ച് സിന്ദാബാദ് വിളിക്കുമായിരുന്നു'; മന്ത്രി റിയാസ്

കോഴിക്കോട്: സ്പീക്കര്‍ എ.എന്‍ ഷംസീറിന്റെ പ്രസംഗ വിവാദത്തില്‍ പ്രതികരണവുമായി മന്ത്രി മുഹമ്മദ് റിയാസ്. സ്പീക്കറുടെ പേര് നാഥുറാം ഗോഡ്‌സെ എന്നായിരുന്നെങ്കില്‍ ബിജെപി പ്രസിഡന്റ് കെട്ടിപ്പിടിച്ച് സിന്ദാബാദ് വിളിക്കുമായിരുന്നു എന്ന് റിയാസ് പറഞ്ഞു. സംഘപരിവാര്‍ അജണ്ട് നടപ്പിലാക്കാനുള്ള ബോധപൂര്‍വ്വമായ ശ്രമമാണ് നിലവില്‍ നടക്കുന്നതെന്നും മന്ത്രി പറഞ്ഞു.

സംഘപരിവാര്‍ അജണ്ട നടപ്പിലാക്കാനുള്ള ബോധപൂര്‍വ്വമായ ശ്രമമാണ് നിലവില്‍ നടക്കുന്നതെന്ന് റിയാസ് പറഞ്ഞു. ലോക്‌സഭാ തിരഞ്ഞെടുപ്പിന് ഇത് ഒരു നല്ല അവസരമായി കാണണമെന്ന് ബി.ജെ.പിയുടെ സംസ്ഥാന പ്രസിഡന്റ് പറഞ്ഞതായി ഇപ്പോള്‍ പുറത്ത് വന്നിട്ടുണ്ട്. കേരളത്തില്‍ മതധ്രൂവികരണം നടത്താനുള്ള ശ്രമമാണ് നടക്കുന്നത്. ഒരു മതത്തിനും വര്‍ഗീയതയില്ല. വര്‍ഗീയതയ്ക്ക് മതവുമില്ല. കേരളത്തിലെ ജനങ്ങളാകെ ഇടതുപക്ഷപ്രസ്ഥാനത്തിനോടൊപ്പം നിലകൊണ്ടതുകൊണ്ടാണ് തുടര്‍ഭരണമുണ്ടായതെന്നും അദ്ദേഹം ചൂണ്ടിക്കാട്ടി.

'സ്പീക്കറുടെ പേര് ഗോഡ്‌സെ എന്നായിരുന്നെങ്കില്‍ ബി.ജെ.പി സംസ്ഥാന അധ്യക്ഷന്‍ ഇപ്പോ കെട്ടിപ്പിടിച്ച് സിന്ദാബാദ് വിളിക്കുമായിരുന്നു. ഇതിന്റെയൊക്കെ പിന്നിലുള്ള താത്പര്യം എന്താണെന്ന് അറിയാം. സ്പീക്കര്‍ ഇന്നോ ഇന്നലെയോ സാമൂഹിക പ്രവര്‍ത്തനം ആരംഭിച്ച വ്യക്തിയല്ല. അതുപോലെ, എ.കെ ബാലന്‍ പഠിച്ച് കാര്യം പറയുന്ന വ്യക്തിയാണ്. അദ്ദേഹം വിഷയത്തില്‍ അഭിപ്രായം പറഞ്ഞപ്പോഴുണ്ടായിട്ടുള്ള പരിഹാസം നമ്മള്‍ കണ്ടതാണ്. പഴയ ജന്മിത്വ കാലഘട്ടത്തിലേക്ക് കേരളത്തെ കൊണ്ടുപോകാനുള്ള ശ്രമമല്ലെ അതിലൂടെ നടന്നത്', മന്ത്രി ആരോപിച്ചു.