ന്യൂഡല്‍ഹി: മഹാരാഷ്ട്രക്കും മധ്യപ്രദേശിനും കര്‍ണാടകക്കും പിന്നാലെ ഡല്‍ഹിയിലും 'ഓപറേഷന്‍ താമര'. തങ്ങളുടെ ചില എം.എല്‍.എമാരെകാണാനില്ലെന്ന പരാതിയുമായി ആം ആദ്മി പാര്‍ട്ടി (എ.എ.പി) രംഗത്തെത്തി. സംസ്ഥാനത്ത് ബി.ജെ.പി ഭരണം പിടിച്ചെടുക്കാനുള്ള കരുക്കള്‍ നീക്കുന്നുവെന്ന വാര്‍ത്തകള്‍ പ്രചരിക്കുന്നതിനിടെയാണ് ഇത്.

വ്യാഴാഴ്ച രാവിലെ 11 മണിക്ക് മുഖ്യമന്ത്രി അരവിന്ദ് കെജ്‌രിവാളിന്റെ വസതിയില്‍ വിളിച്ചു ചേര്‍ത്ത എ.എ.പി യോഗത്തിന് ഇവര്‍ എത്തിയിട്ടില്ല. എം.എല്‍.എമാരെ വിളിച്ചിട്ട് കിട്ടുന്നില്ലെന്നും പറയുന്നു. ഇവര്‍ പരിധിക്ക് പുറത്താണെന്നാണ് ലഭ്യമായ വിവരം.

ബി.ജെ.പിയില്‍ ചേര്‍ന്നാല്‍ 20 കോടി രൂപ തരാമെന്നും മറ്റുള്ളവരെ ഒപ്പം കൂട്ടിയാല്‍ 25 കോടി നല്‍കാമെന്നും എം.എല്‍.എമാര്‍ക്ക് ബി.ജെ.പി വാഗ്ദാനം ലഭിച്ചുവെന്ന വെളിപ്പെടുത്തലിന് പിന്നാലെയാണ് നാടകീയ സംഭവ വികാസം.

മദ്യനയവുമായി ബന്ധപ്പെട്ട് ഉപമുഖ്യമന്ത്രി മനീഷ് സിസോദിയക്കെതിരെ സി.ബി.ഐ അന്വേഷണം നടന്നതിനു പിന്നാലെയാണ് ആപ് എം.എല്‍.എമാരെ ചാക്കിട്ട് പിടിക്കാന്‍ ബി.ജെ.പി ശ്രമം തുടങ്ങിയതെന്നാണ് റിപ്പോര്‍ട്ട്. അതേസമയം, മദ്യനയ വിവാദത്തില്‍ നിന്ന് മുഖംരക്ഷിക്കാന്‍ എ.എ.പി പുതിയ അടവുമായി വന്നിരിക്കയാണെന്നാണ് ബി.ജെ.പിയുടെ ആരോപണം. മദ്യനയ വിവാദമടക്കം നിലവിലെ രാഷ്ട്രീയ സാഹചര്യം ചര്‍ച്ച ചെയ്യാനാണ് കെജ്‌രിവാള്‍ യോഗം വിളിച്ചത്.

എ.എ.പിയെ പിളര്‍ത്തിയാല്‍ ബി.ജെ.പി തനിക്ക് മുഖ്യമന്ത്രിസ്ഥാനം വാഗ്ദാനം ചെയ്തുവെന്നും എല്ലാ കേസുകളും അവസാനിപ്പിക്കുമെന്ന് ഉറപ്പു നല്‍കിയെന്നും സിസോദിയ വെളിപ്പെടുത്തിയിരുന്നു. എ.എ.പി വിട്ട് ബി.ജെ.പിയില്‍ ചേരാന്‍ തനിക്ക് സന്ദേശം ലഭിച്ച കാര്യവും അദ്ദേഹം വെളിപ്പെടുത്തി.