ന്യൂഡല്‍ഹി: മദ്യനയക്കേസില്‍ ഇ.ഡി കസ്റ്റഡിയിലുള്ള ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍ അയച്ച സന്ദേശം വായിച്ച് ഭാര്യയും മുന്‍ ഐ.ആര്‍.എസ് ഉദ്യോഗസ്ഥയുമായ സുനിത കെജ് രിവാള്‍. സമൂഹത്തിന് വേണ്ടി പ്രവര്‍ത്തിക്കുന്നത് തുടരണമെന്നും ബി.ജെ.പിയില്‍ നിന്നുള്ളവരെ വെറുക്കരുതെന്നും സന്ദേശത്തില്‍ പറയുന്നു. 

'സമൂഹത്തിനു വേണ്ടി ജോലി ചെയ്യുന്നതു തുടരണം. ബി.ജെ.പിയില്‍നിന്നുള്ള ആളുകളെ വെറുക്കരുത്. അവരെല്ലാവരും നമ്മുടെ സഹോദരീ സഹോദരന്മാരാണ്. ഞാന്‍ താമസിയാതെ പുറത്തുവരും. എന്റെ വാഗ്ദാനങ്ങള്‍ നിറവേറ്റും. നമ്മുടെ രാജ്യത്തെ അകത്തുനിന്നും പുറത്തുനിന്നും ദുര്‍ബലപ്പെടുത്തുന്ന ഒരുപാട് ശക്തികളുണ്ട്. ലോകത്തെ ഏറ്റവും കരുത്തുറ്റതും മഹത്തായതുമായ രാജ്യമായി നമ്മുടെ രാജ്യത്തെ വളര്‍ത്തേണ്ടതുണ്ട് ' - കത്തില്‍ കെജ്‌രിവാള്‍ പറഞ്ഞു. 

കെജ്‌രിവാളിനെ വ്യാഴാഴ്ച രാത്രി ഒമ്പതുമണിയോടെയാണ് വീട്ടില്‍ നിന്നും അറസ്റ്റുചെയ്തത്. രണ്ടുമണിക്കൂര്‍ നേരത്തെ ചോദ്യം ചെയ്യലിനൊടുവിലായിരുന്നു അറസ്റ്റ്. തുടര്‍ന്ന് വെള്ളിയാഴ്ച ഡല്‍ഹി റോസ് അവന്യൂ കോടതി അദ്ദേഹത്തെ മാര്‍ച്ച് 28 വരെ ഇ.ഡി. കസ്റ്റഡിയില്‍ വിട്ടു.