കടം വീട്ടി കൊമ്പന്‍മാര്‍; ബെംഗളൂരുവിനെ 2-1ന് മുട്ടുകുത്തിച്ച് ബ്ലാസ്റ്റേഴ്‌സ്

ഐ.എസ്.എല്ലില്‍ ജയത്തോടെ തുടങ്ങി കേരള ബ്ലാസ്‌റ്റേഴ്‌സ്. വാശിയേറിയ ഉദ്ഘാടന മത്സരത്തില്‍ ഒന്നിനെതിരെ രണ്ട് ഗോളുകള്‍ക്കാണ് കൊമ്പന്‍മാര്‍ ചിരവൈരികളായ ബെംഗളൂരുവിനെ മുട്ടുകുത്തിച്ചത്. ജയത്തോടെ കഴിഞ്ഞ സീസണില്‍ ബെംഗളൂരുവിനോടേറ്റ പരാജയത്തിന്റെ കണക്ക് തീര്‍ക്കാനും ബ്ലാസ്റ്റേഴ്‌സിനായി.

52ാം മിനുട്ടില്‍ ബെംഗളൂരുവിന്റെ പ്രതിരോധ നിര താരം കെസിയ വിന്‍ഡോര്‍പിന്റെ പിഴവാണ് ബ്ലാസ്റ്റേഴ്‌സിന് ആദ്യ സ്‌കോര്‍ സമ്മാനിച്ചത്. കോര്‍ണര്‍ കിക്കിനിടെ പന്ത് താരത്തിന്റെ കാലില്‍ തട്ടി സെല്‍ഫ് ഗോളാവുകയായിരുന്നു. തുടര്‍ന്ന് 69ാം മിനുട്ടില്‍ ബെംഗളൂരു ഗോളി ഗുര്‍പ്രീത് സിങ്ങിന്റെ പിഴവ് മുതലെടുത്ത് ബ്ലാസ്റ്റേഴ്‌സ് നായകന്‍ അഡ്രിയാന്‍ ലൂണ മഞ്ഞപ്പടയുടെ ലീഡ് വര്‍ധിപ്പിച്ചു.

വിരസമായ ആദ്യ പകുതി കളിയുടെ രസം കൊല്ലുമെന്ന് പ്രതീക്ഷിച്ചെങ്കിലും രണ്ടാം പകുതിയില്‍ ബ്ലാസ്റ്റേഴ്‌സ് മികച്ച മുന്നേറ്റങ്ങളുമായി കളം നിറഞ്ഞ് കളിച്ചു. പക്ഷെ കളിയുടെ അവസാന മിനുട്ടില്‍ ഒരു ഗോള്‍ തിരിച്ചടിച്ച് ബെംഗളൂരു പ്രതീക്ഷ ഉയര്‍ത്തെങ്കിലും പരാജയപ്പെടുകയായിരുന്നു. 90ാം മിനുട്ടില്‍ കര്‍ട്ടിസ് മെയ്‌നിലൂടെയാണ് ബെംഗളൂരു ആശ്വാസ ഗോള്‍ കണ്ടെത്തിയത്.