ലഖ്‌നൗ: മദ്രസകളുടെ വരുമാന സ്രോതസ് പരിശോധിക്കാന്‍ ഉത്തര്‍പ്രദേശിലെ യോഗി ആദിത്യനാഥ് സര്‍ക്കാര്‍. സര്‍ക്കാര്‍ അംഗീകാരമില്ലെന്ന് പ്രഖ്യാപിച്ച മദ്രസകളുടെ വരുമാന സ്രോതസ്സാണ് പരിശോധിക്കുന്നത്. സര്‍വേ നടപടികള്‍ക്കു പിന്നാലെയാണ് പുതിയ നീക്കം. ഉത്തര്‍പ്രദേശിന്റെ അതിര്‍ത്തി ജില്ലകളിലുള്ള മദ്രസകളിലാണ് അന്വേഷണമെന്ന് വാര്‍ത്താ ഏജന്‍സിയായ എ.എന്‍.ഐ റിപ്പോര്‍ട്ട് ചെയ്തു.

അടുത്തിടെ നടത്തിയ സര്‍വേയില്‍ നേപ്പാളിനോട് ചേര്‍ന്നുള്ള അതിര്‍ത്തി ജില്ലകളില്‍ 1,500ലേറെ മദ്രസകള്‍ക്ക് അംഗീകാരമില്ലെന്ന് യോഗി ഭരണകൂടം നേരത്തെ പ്രഖ്യാപിച്ചിരുന്നു. ഇതില്‍ മിക്ക മദ്രസകളും സകാത്ത് ഫണ്ടുകളാണ് വരുമാനമാര്‍ഗമായി സൂചിപ്പിച്ചിട്ടുള്ളത്. ഈ സകാത്തിന്റെ സ്രോതസുകളെക്കുറിച്ചാണ് ഇപ്പോള്‍ അന്വേഷണം പ്രഖ്യാപിച്ചിരിക്കുന്നത്.

സിദ്ധാര്‍ത്ഥ്‌നഗര്‍, ബല്‍റാംപൂര്‍, ലഖിംപൂര്‍ ഖേരി, മഹാരാജ് ഗഞ്ച്, ബഹ്‌റായ്ച്ച്, ശ്രാവസ്തി എന്നീ ജില്ലകളിലെ മദ്രസകളിലാണ് കൂടുതല്‍ അന്വേഷണത്തിനൊരുങ്ങുന്നത്. മദ്രസകള്‍ ചൂണ്ടിക്കാട്ടിയ സകാത്ത് എവിടെനിന്നാണ് വരുന്നതെന്ന് വ്യക്തമാകേണ്ടതുണ്ടെന്ന് യോഗി സര്‍ക്കാരിലെ ന്യൂനപക്ഷ മന്ത്രി ദാനിഷ് ആസാദ് അന്‍സാരി പറഞ്ഞു. ഇതു സംബന്ധിച്ചുള്ള യോഗം ഉടന്‍ ചേരുമെന്നും മന്ത്രി അറിയിച്ചു.

യു.പി സര്‍ക്കാര്‍ നടത്തിയ സര്‍വേയില്‍ സംസ്ഥാനത്ത് 8,500 മദ്രസകള്‍ അനധികൃതമായി പ്രവര്‍ത്തിക്കുന്നുണ്ടെന്നാണ് കണ്ടെത്തിയിരുന്നത്. ഇതില്‍ 7.64 ലക്ഷം വിദ്യാര്‍ത്ഥികള്‍ പഠിക്കുന്നുണ്ട്. രാജ്യത്തെ പ്രശസ്ത ഇസ്‌ലാമിക മതപഠന കേന്ദ്രമായ ദാറുല്‍ ഉലൂം ദയൂബന്ദിനെയും നേരത്തെ നിയമവിരുദ്ധ മദ്‌റസയായി പ്രഖ്യാപിച്ചിരുന്നു. പിന്നീട് പ്രതിഷേധത്തിനു പിന്നാലെ ദാറുല്‍ ഉലൂം അനധികൃത പട്ടികയിലില്ലെന്നും വിശദീകരണം വന്നിരുന്നു.