കോഴിക്കോട്: സംസ്ഥാനത്ത് നിപ ഭീതി ഒഴിയുന്നു. ഇന്നലെ പരിശോധിച്ച 20 സാമ്പിളുകള്‍ കൂടി നെഗറ്റിവ്. ആരോഗ്യ മന്ത്രി വീണാ ജോര്‍ജ്ജ് വാര്‍ത്താമാധ്യമങ്ങളെ അറിയിച്ചതാണ് ഇക്കാര്യം. ഇതുവരെ പരിശോധിച്ചത് മുപ്പത് സാമ്പിളുകള്‍. 21 പേരുടെ ഫലം ലഭിക്കാനുണ്ടെന്നും മന്ത്രി അറിയിച്ചു.
68 പേരാണ് മെഡിക്കല്‍ കോളജില്‍ നിരീക്ഷണത്തിലുള്ളത്.

വൈറസിന്റെ ഉറവിടം കണ്ടെത്താന്‍ ശ്രമങ്ങള്‍ തുടരുകയാണെന്ന് മന്ത്രി വ്യക്തമാക്കി. മൃഗസംരക്ഷണ വകുപ്പ് പരിശോധന നടത്തി. ഭോപ്പാലില്‍ നിന്നുള്ള എന്‍.ഐ.വി സംഘം രണ്ടു ദിവസത്തിനകമെത്തുമെന്നും മന്ത്രി പറഞ്ഞു. വിവിധ വകുപ്പുകളുടെ ഏകോപന യോഗം നടത്തും.
സമഗ്രമായ പരിശോധന നടത്തുമെന്ന് അവര്‍ ആവര്‍ത്തിച്ചു. 42 ദിവസം നിരീക്ഷണം തുടരും.

രോഗക്ഷണങ്ങളുള്ളവരുടെ ആരോഗ്യ സ്ഥിതി തൃപ്തികരമാണെന്ന് മന്ത്രി പറഞ്ഞു. സ്ഥിതിഗതികള്‍ വിലയിരുത്താന്‍ മന്ത്രിമാര്‍ കോഴിക്കോട് തുടരും. മൃഗങ്ങളുടേയും പക്ഷികളുടേയും പരിശോധനക്ക് തടസ്സമില്ല. ചാത്തമംഗലത്തെ നിയന്ത്രണങ്ങളെ കുറിച്ച് ചര്‍ച്ച ചെയ്യും. വീടുകളില്‍ കയറിയുള്ള വിവരശേഖരണം ഫലപ്രദം. വവ്വാലുകളും മറ്റും കഴിച്ചതിന്റെ ബാക്കി ഭക്ഷിക്കരുതെന്നാണ് നിര്‍ദ്ദേശം. പുറത്തു നിന്നും വാങ്ങുന്നതും മറ്റുമായ ഫലങ്ങള്‍ നന്നായി കഴുകിയ ശേഷം ഉപയോഗിക്കാമെന്നും മന്ത്രി കൂട്ടിച്ചേര്‍ത്തു.