അബുദാബി: ലോകത്തിലെ എറ്റവും മികച്ച വിമാന കമ്പനികളിലൊന്നായ ഇത്തിഹാദ് എയർവേയ്സ് അടുത്ത 7 വർഷത്തേക്ക് ഓരോ വർഷവും 1000 പേർക്ക് ജോലി നൽകും. അടുത്ത വർഷം പുതുതായി 10 വിമാനത്താവളങ്ങളിലേക്ക് ഇത്തിഹാദ് എയർവേയ്‌സ് സർവീസ് ആരംഭിക്കുമെന്നും ചീഫ് എക്‌സിക്യൂട്ടീവ് ഓഫീസർ അന്റൊണാൾഡോ നെവെസ് ദുബൈ എയർഷോ പരിപാടിക്കിടെ മാധ്യമങ്ങളോട് പറഞ്ഞു.

കൊവിഡ് കാലത്തെ പ്രതിസന്ധിക്ക് ശേഷം വിമാനയാത്രാ മേഖല വലിയ തിരിച്ചുവരവാണ് നടത്തുന്നതെന്നും വരുംവർഷങ്ങളിൽ ഈ രംഗത്തേക്ക് കൂടുതൽ പേർക്ക് തൊഴിൽ ലഭിക്കുമെന്നും അദ്ദേഹം ചൂണ്ടിക്കാട്ടി. ഇത്തിഹാദ് എയർവേസ് അടുത്ത ഏഴ് വർഷത്തേക്ക് പ്രതിവർഷം 800 മുതൽ 1000 വരെ ആളുകളെ നിയമിക്കും. ഏഴ് വർഷം കൊണ്ട് കമ്പനിയുടെ പ്രവർത്തനങ്ങൾ ഇരട്ടിയാക്കാനാണ് ഉദ്ദേശിക്കുന്നതെന്നും അദ്ദേഹം വെളിപ്പെടുത്തി.ഇത്തിഹാദ് ഈ വർഷം 12 പുതിയ ലക്ഷ്യസ്ഥാനങ്ങളിലേക്ക് സർവീസ് ആരംഭിച്ചിരുന്നു. അടുത്ത വർഷം പുതുതായി 10 വിമാനത്താവളങ്ങളിലേക്ക് സർവീസ് നടത്തുമെന്നും സിഇഒ വ്യക്തമാക്കി.

ലോകത്തിലെ ഏറ്റവും മികച്ച ടെർമിനലുകളിൽ ഒന്നാണ് ഈ മാസം ഒന്നു മുതൽ അബുദാബിയിൽ പ്രവർത്തനമാരംഭിച്ചതെന്നും അദ്ദേഹം അഭിപ്രായപ്പെട്ടു. 28 എയർലൈനുകളും പുതിയ ടെർമിനലിലേക്ക് മാറിക്കഴിഞ്ഞു. വലിയ ടെർമിനലുകൾ ഇല്ലാതെ മുന്നോട്ട് പോകാനാവില്ലെന്നും ഇത്തിഹാദ് അടുത്ത വർഷം 17 ദശലക്ഷം യാത്രക്കാരെയും അടുത്ത ഏഴ് വർഷത്തിനുള്ളിൽ 33 ദശലക്ഷം യാത്രക്കാരെയും എത്തിക്കാൻ പോകുകയാണെന്നും അദ്ദേഹം വിശദീകരിച്ചു.