മീററ്റ്: മതപരിവര്‍ത്തനം നടത്തിയെന്ന് ആരോപിച്ച് ഉത്തര്‍പ്രദേശിലെ പ്രമുഖ ഇസ്‌ലാമിക പണ്ഡിതനും ഗ്ലോബല്‍ പീസ് സെന്റര്‍ ഡയറക്ടറുമായ മൗലാനാ ഖലീം സിദ്ദീഖിയെ ഉത്തര്‍പ്രദേശ് ഭീകരവിരുദ്ധ സ്‌ക്വാഡ് (എ.ടി.എസ്) അറസ്റ്റ് ചെയ്തു.
ഉമര്‍ ഗൗതം കേസുമായി ബന്ധപ്പെട്ടുള്ള അന്വേഷണത്തിലാണ് ഖലീം സിദ്ദീഖിയുടെ പങ്ക് വെളിപ്പെട്ടതെന്നാണ് അന്വേഷണ സംഘം നല്‍കുന്ന വിവരം. ജൂണ്‍ മുതല്‍ ഉമര്‍ ഗൗതം മതംമാറ്റ റാക്കറ്റിന് നേതൃത്വം നല്‍കിയെന്ന കേസില്‍ ജയിലിലാണ്. ചൊവ്വാഴ്ച രാത്രി ഒന്‍പതോടെ മീററ്റില്‍ എത്തിയപ്പോഴാണ് 64 കാരനായ സിദ്ദീഖിയെ എ.ടി.എസ് അറസ്റ്റ് ചെയ്തത്. മുസാഫര്‍നഗറിലെ ഫുലാത് സ്വദേശിയാണ് അദ്ദേഹം. വിദേശ പണം സിദ്ദീഖി കൈപറ്റിയതിനെ കുറിച്ച് അന്വേഷിക്കാന്‍ ആറംഗ എ.ടി.എസ് സംഘത്തെ നിയോഗിച്ചെന്നും യു.പി ലോ ആന്‍ഡ് ഓഡര്‍ എ.ഡി.ജി പ്രശാന്ത് കുമാര്‍ പറഞ്ഞു.

സിദ്ദീഖിയെ എ.ടി.എസ് ആസ്ഥാനത്ത് ചോദ്യം ചെയ്തു. കോടതിയില്‍ ഹാജരാക്കി. പടിഞ്ഞാറന്‍ യു.പിയില്‍ നിന്നുള്ള പ്രമുഖ പണ്ഡിതനാണ് സിദ്ദീഖി. ദാറുല്‍ ഉലൂം ദയൂബന്ദില്‍ നിന്നും സിദ്ദീഖിയുടെ ഷാ വലിയുല്ലാഹി ട്രസ്റ്റിന് സഹായം ലഭിച്ചിരുന്നുവെന്നും ഷാ വലിയുല്ലാഹിയുടെ പേരില്‍ പഞ്ചാബ്, ഹരിയാന തുടങ്ങിയ സംസ്ഥാനങ്ങളില്‍ മദ്‌റസകള്‍ നിര്‍മിച്ചിരുന്നുവെന്നും രാജസ്ഥാന്‍, മധ്യപ്രദേശ്, ഉത്തര്‍പ്രദേശ്, ഛത്തീസ്ഗഡ്, മധ്യപ്രദേശ്, പഞ്ചാബ്, ഹരിയാന, ഒഡിഷ സംസ്ഥാനങ്ങളിലും അദ്ദേഹം പ്രവര്‍ത്തിച്ചിരുന്നതായും വാര്‍ത്താ ഏജന്‍സി റിപ്പോര്‍ട്ട് ചെയ്തു. അതേസമയം മൗലാനയുടെ അറസ്റ്റ് യു.പി സര്‍ക്കാരിന്റെ രാഷ്ട്രീയ നീക്കമാണെന്ന് ആം ആദ്മി പാര്‍ട്ടി എം.എല്‍.എ അമാനുല്ലാ ഖാന്‍ ആരോപിച്ചു. യു.പിയില്‍ തെരഞ്ഞെടുപ്പ് നടക്കാനിരിക്കെ പ്രമുഖ ഇസ് ലാമിക പണ്ഡിതന്‍ മൗലാന ഖലീം സിദ്ദീഖി സാഹിബ് അറസ്റ്റിലായിരിക്കുന്നു. മുസ്‌ലിംകള്‍ക്കെതിരായ അതിക്രമങ്ങള്‍ വര്‍ധിക്കുകയാണ്. ഈ വിഷയത്തില്‍ മതേതര പാര്‍ട്ടികളുടെ മൗനം ബി.ജെ.പിക്ക് അതിക്രമങ്ങള്‍ തുടരാന്‍ കരുത്താവുകയാണെന്നും അമാനുല്ല ഖാന്‍ ട്വീറ്റ് ചെയ്തു.