പൗരത്വ പ്രക്ഷോഭത്തിൽ പങ്കെടുത്തതിന് ചുമത്തപ്പെടുന്ന പിഴ സംഖ്യ ജനകീയ സമാഹാരണത്തിലൂടെ ശേഖരിക്കുമെന്ന് മുസസ്ലിം യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങളും ജനറൽ സെക്രട്ടറി പി.കെ ഫിറോസും പറഞ്ഞു. പൗരത്വ പ്രക്ഷോഭത്തിൽ പങ്കാളികളായവരുടെ പേരിൽ പൊലിസ് ചുമത്തിയ കേസുകൾ പിൻവലിക്കും എന്ന പിണറായി സർക്കാരിന്റെ പ്രഖ്യാപനം ഇതുവരെയായിട്ടും പ്രാവർത്തികമായിട്ടില്ല.
പ്രഖ്യാപനത്തിലൂടെ വോട്ട് നേടി അധികാരത്തിലേറിയതിന് ശേഷം സർക്കാർ മലക്കംമറിഞ്ഞിരിക്കുകയാണ്. പൗരത്വ വിഷയത്തിൽ സി.പി.എം പുലർത്തുന്ന ഇരട്ടത്താപ്പാണ് ഇതിലൂടെ വ്യക്തമാകുന്നത്.
സർക്കാർ വിചാരിച്ചാൽ ഏത് സമയത്തും കേസ് പിൻവലിക്കാവുന്നതാണ്.

സി.പി.എം നേതാക്കൾ പ്രതികളായ പല കേസുകൾ പിൻവലിക്കുകയും കോടി കണക്കിന് രൂപ കേസ് നടത്തിപ്പിനായി സർക്കാർ ഖജനാവിൽ നിന്നും ചിലവഴിക്കുകയും ചെയ്യുന്ന സർക്കാർ ആണ് പൗരത്വ പ്രക്ഷോഭത്തിൽ പങ്കെടുത്തതിന്റെ പേരിൽ ഭീമമായ പിഴ സംഖ്യ ഈടാക്കുന്നതെന്ന് നേതാക്കൾ കുറ്റപ്പെടുത്തി.

രാജ്യത്തെ ബി.ജെ.പി ഭരിക്കാത്ത സംസ്ഥാനങ്ങളിൽ കേരളത്തിൽ ഒഴികെ മറ്റിടങ്ങളിൽ എല്ലാം തന്നെ ഇത് സംബന്ധിച്ച കേസുകൾ പിൻവലിച്ച് അതത് സർക്കാരുകൾ ഈ സമരത്തിന് പിന്തുണ അറിയിച്ചത് ആശാവഹമാണെന്നും നേതാക്കൾ കൂട്ടിച്ചേർത്തു.
പിഴ സംഖ്യ സമാഹരണത്തിനായി നവംബർ 7ന് ഗൂഗിൾ പേ ചാലഞ്ചിലൂടെയാണ് യൂത്ത് ലീഗ് ഫണ്ട് ശേഖരിക്കുന്നത്്. 20 രൂപ ചലഞ്ചിനാണ് ആഹ്വാനം ചെയ്തിട്ടുളളത്.
പൗരത്വ പ്രക്ഷോഭത്തിൽ പങ്കാളികളായ സാമൂഹ്യ സാംസ്കാരിക രംഗത്തെ പ്രമുഖർ യൂത്ത് ലീഗ് കാംപയിനിൽ പങ്കു ചേരും.