തിരുവനന്തപുരം: ശിശുമരണങ്ങള്‍ ഉണ്ടായ അട്ടപ്പാടിക്ക് കൂടുതല്‍ ശ്രദ്ധ നല്‍കാന്‍ സര്‍ക്കാര്‍ തീരുമാനം. കൂടുതല്‍ ആംബുലന്‍സുകള്‍ ഉറപ്പാക്കും. പോഷകാഹാരക്കുറവ് അടക്കമുള്ള ആരോഗ്യ പ്രശ്‌നങ്ങള്‍ക്ക് പരിഹാരം കാണാന്‍ ശനിയാഴ്ച തിരുവനന്തപുരത്ത് പ്രത്യേക യോഗം വിളിക്കും.

പട്ടികവര്‍ഗ്ഗ വിഭാഗങ്ങള്‍ക്കുള്ള പദ്ധതികളുടെ ഫണ്ട് വിനിയോഗത്തിന് ധനവകുപ്പിന്റെ പ്രത്യേക അനുമതി നല്‍കും. അട്ടപ്പാടി സ്വദേശികളായ സര്‍ക്കാര്‍ ഉദ്യോഗസ്ഥരെ മേഖലയില്‍ വിന്യസിക്കും.

ഗോതമ്പിന് പകരം ആട്ട നല്‍കും, അട്ടപ്പാടിയില്‍ മദ്യവര്‍ജ്ജന ബോധവല്‍ക്കരണം ശക്തമാക്കാനും മന്ത്രി കെ രാധാകൃഷ്ണന്‍ വിളിച്ച ഉന്നതതലയോഗത്തില്‍ തീരുമാനമായി.

മന്ത്രിമാരായ കെ.എന്‍ ബാലഗോപാല്‍, ജി.ആര്‍ അനില്‍, വീണാ ജോര്‍ജ്, എം.വി ഗോവിന്ദന്‍ എന്നിവര്‍ യോഗത്തില്‍ പങ്കെടുത്തു.