2026ല്‍ കേരളത്തില്‍ ബിജെപി അധികാരത്തിലെത്തുമെന്നും, സിപിഎമ്മും കോണ്‍ഗ്രസും കേരളത്തില്‍ പരസ്പരം മത്സരിക്കുന്നത് നാടകമാണെന്നും അസം മുഖ്യമന്ത്രി  ഹിമന്ത ബിശ്വ ശര്‍മ്മ.എന്‍ഡിഎ സ്ഥാനാര്‍ഥി കെ.സുരേന്ദ്രന്റെ പ്രചരാണാര്‍ഥം വണ്ടൂരില്‍ നടന്ന റോഡ് ഷോയില്‍ സംസാരിക്കുകയായിരുന്നു ശര്‍മ്മ. കെ. സുരേന്ദ്രന്‍, മുന്‍ കേന്ദ്ര മന്ത്രി അല്‍ഫോന്‍സ് കണ്ണന്താനം എന്നിവര്‍ റോഡ് ഷോയ്ക്ക് നേതൃത്വം നല്‍കി.

കേരളത്തില്‍ രാഷ്ട്രീയ മാറ്റം വിദൂരമല്ല. കോണ്‍ഗ്രസിനെയും സിപിഎമ്മിനെയും കെട്ടുകെട്ടിച്ച് 2026ല്‍ കേരളത്തില്‍ ബിജെപി സര്‍ക്കാര്‍ അധികാരത്തില്‍ വരും. 2016ന് മുന്‍പ് അസമില്‍ ബിജെപി സര്‍ക്കാര്‍ വരുമെന്ന് ആരും പറയില്ലായിരുന്നു. 36 ശതമാനം മുസ്ലിം സമുദായമുള്ള സ്ഥലമാണ് അസം. അവിടെ രണ്ടു തവണ അധികാരത്തില്‍ വന്നു. അതും നൂറില്‍ അധികം സീറ്റുമായി. എല്ലാവരെയും ഉള്‍ക്കൊള്ളുന്നവരാണ് ബിജെപി. എല്ലാവരുടെയും വികസനത്തിനു വേണ്ടിയാണ് ബിജെപി നിലകൊള്ളുന്നത്.

ഉത്തര്‍പ്രദേശില്‍നിന്നു തോല്‍പ്പിച്ചു വിട്ടയാള്‍ കേരളത്തില്‍നിന്ന് ജയിച്ചാല്‍ കേരളത്തിന് അത് അപമാനമാണ്. കോണ്‍ഗ്രസിനും സിപിഎമ്മിനും രാജ്യം മുന്നോട്ടു കൊണ്ടു പോകാന്‍ അറിയില്ല. അതു മോദിക്ക് മാത്രമേ അറിയൂ ശര്‍മ്മ പറഞ്ഞു.