മദ്യനയ അഴിമതിക്കേസില്‍ ജയിലില്‍ കഴിയുന്ന ഡല്‍ഹി മുന്‍ ഉപമുഖ്യമന്ത്രി മനീഷ് സിസോദിയയുടെ ജാമ്യാപേക്ഷ സുപ്രീംകോടതി തള്ളി. കേസില്‍ ജൂലൈ മൂന്നിനകം അന്തിമ കുറ്റപത്രം സമര്‍പ്പിക്കാന്‍ ഇഡിയോടും സിബിഐയോടും കോടതി ആവശ്യപ്പെട്ടിട്ടുണ്ട്. 15 മാസമായി സിസോദിയ കസ്റ്റഡിയിലാണെന്നും കേസില്‍ ഇതുവരെ വിചാരണ തുടങ്ങിയിട്ടില്ലെന്നും അഭിഭാഷകന്‍ കോടതിയില്‍ ചൂണ്ടിക്കാട്ടിയെങ്കിലും ജാമ്യം ഇപ്പോള്‍ പരി?ഗണിക്കാനാവില്ലെന്ന നിലപാടാണ് കോടതി സ്വീകരിച്ചത്. കേസില്‍ അന്തിമ കുറ്റപത്രം സമര്‍പ്പിച്ചതിനു ശേഷം മാത്രമേ ജാമ്യ ഹര്‍ജി കോടതി പരി?ഗണിക്കുകയുള്ളൂ.

സിസോദിയയുടെ ജാമ്യ ഹര്‍ജി ഡല്‍ഹി ഹൈകോടതിയും തള്ളിയിരുന്നു. അഴിമതി നടന്നതായി അന്വേഷണ സംഘം പറയുന്ന കാലയളവില്‍, ഉപമുഖ്യമന്ത്രിയായിരുന്ന സിസോദിയ അധികാര ദുര്‍വിനിയോഗം നടത്തിയിട്ടുണ്ടാകാമെന്ന് ഹൈകോടതി നിരീക്ഷിച്ചു. ജാമ്യം നല്‍കിയാല്‍ സാക്ഷികളെ ഉള്‍പ്പെടെ സ്വാധീനിക്കാമെന്ന ഇഡി വാദവും കോടതി അംഗീകരിച്ചു. നേരത്തെ തനിക്കെതിരെയുള്ള ഡിജിറ്റല്‍ തെളിവ് നശിപ്പിക്കാന്‍ സിസോദിയ ശ്രമിച്ചതായും ഇഡി കോടതിയില്‍ പറഞ്ഞു.