തിരുവനന്തപുരം: ലോക്‌സഭാ തെരഞ്ഞെടുപ്പ് പരാജയത്തിനു പിന്നാലെ രാജ്യസഭാ സീറ്റിനെച്ചൊല്ലി എല്‍.ഡി.എഫില്‍ തര്‍ക്കം തുടങ്ങി. രാജ്യസഭാ സീറ്റ് തങ്ങള്‍ക്ക് അവകാശപ്പെട്ടതാണെന്നും വിട്ടുവീഴ്ചയില്ലെന്നും സി.പി.ഐ സംസ്ഥാന സെക്രട്ടറി ബിനോയ് വിശ്വം സി.പി.എം സംസ്ഥാന സെക്രട്ടറി എം.വി ഗോവിന്ദനെയും മുഖ്യമന്ത്രി പിണറായി വിജയനെയും അറിയിച്ചു.

കൂടാതെ കേരള കോണ്‍ഗ്രസും എമ്മും ആര്‍.ജെ.ഡിയും സീറ്റ് ആവശ്യപ്പെട്ട് സമ്മര്‍ദം ശക്തമാക്കി. കോട്ടയത്തെ തോല്‍വിയോടെ സമ്മര്‍ദം ശക്തമാക്കുകയാണ് കേരള കോണ്‍ഗ്രസ്. യു.ഡി.എഫില്‍ നിന്ന് രാജ്യസഭാ സീറ്റുമായാണ് എല്‍.ഡി.എഫിലേക്ക് വന്നത്. കാലാവധി കഴിയുന്ന സീറ്റിന് അവകാശം തങ്ങള്‍ക്കു തന്നെയെന്ന് കേരള കോണ്‍ഗ്രസ് വ്യക്തമാക്കുന്നു. 

എന്നാല്‍ ലോക്‌സഭാ തെരഞ്ഞെടുപ്പില്‍ പരിഗണിക്കാതിരുന്ന ആര്‍.ജെ.ഡിയെ രാജ്യസഭാ സീറ്റിലേക്ക് പരിഗണിക്കണമെന്നാണ് നേതൃത്വത്തിന്റെ ആവശ്യം. കേരള കോണ്‍ഗ്രസിനും ആര്‍.ജെ.ഡിക്കും അര്‍ഹിക്കുന്ന പ്രാധാന്യം ലഭിക്കുന്നില്ലെന്നാണ് പരാതി. അവഗണന സഹിച്ച് മുന്നണിയില്‍ നില്‍ക്കുന്നതെന്തിനെന്നാണ് ഇവര്‍ ഉന്നയിക്കുന്ന ചോദ്യം. ഇതിനിടെ തെരഞ്ഞെടുപ്പ് പരാജയത്തില്‍ സര്‍ക്കാരിനെതിരേ രൂക്ഷ വിമര്‍ശനമാണ് സി.പി.ഐ നേതാവ് കെ.കെ ശിവരാമന്‍ നടത്തിയത്.

പരാജയത്തിന് കാരണം ആഭ്യന്തര വകുപ്പാണെന്ന് ആര്‍.ജെ.ഡി സംസ്ഥാന അധ്യക്ഷന്‍ എം.വി ശ്രേയാംസ് കുമാറും പറഞ്ഞു. പൊലിസ് ഭരണം ജനങ്ങളെ അകറ്റിയെന്നും അദ്ദേഹം പറഞ്ഞു. ഘടകകക്ഷികളുമായി സി.പി.എം ഇന്നും നാളെയുമായി ചര്‍ച്ച നടത്തും. അതിനു ശേഷം എല്‍.ഡി.എഫ് യോഗം കൂടി അന്തിമ തീരുമാനത്തിലെത്തും. രാജ്യസഭാ സീറ്റ് സി.പി.ഐക്ക് നല്‍കി ഭരണ പരിഷ്‌കാര കമ്മിഷന്‍ സ്ഥാനം കേരള കോണ്‍ഗ്രസിന് നല്‍കാനാണ് സി.പി.എം ആലോചിക്കുന്നത്.