ദുബൈ: ജനറല്‍ ഡയരക്ടറേറ്റ് ഓഫ് റസിഡന്‍സി ആന്‍ഡ് ഫോറീനേഴ്‌സ് അഫയേഴ്‌സ് (ജി.ഡി.ആര്‍.എഫ്.എ) മികച്ച ജീവനക്കാരെ മെഡലുകളും ബാഡ്ജുകളുമണിയിച്ച് ആദരിച്ചു. ദുബൈ വേള്‍ഡ് ട്രേഡ് സെന്ററില്‍ നടന്ന പരിപാടിയില്‍ 'എക്‌സ്‌പോ' ബാഡ്ജും 'ഹാപിനസ്' ബാഡ്ജും ഉള്‍പ്പെടെ ഒട്ടേറെ ബഹുമതികള്‍ ജീവനക്കാര്‍ക്ക് കൈമാറി. 

ഡയരക്ടര്‍ ജനറല്‍ ലഫ്.ജനറല്‍ മുഹമ്മദ് അഹ്മദ് അല്‍ മര്‍റി, അസിസ്റ്റന്റ് ഡയരക്ടര്‍ ജനറല്‍ മേജര്‍ ജനറല്‍ ഉബൈദ് മുഹൈര്‍ ബിന്‍ സുറൂര്‍ അടക്കമുള്ള ഉന്നത ഉദ്യോഗസ്ഥര്‍ ചടങ്ങില്‍ സംബന്ധിച്ചു. ജോലിയിലെ മികവ് വര്‍ധിപ്പിക്കുക, സര്‍ഗാത്മകത പ്രോത്സാഹിപ്പിക്കുക, ജീവനക്കാര്‍ക്കിടയില്‍ നേതൃപരമായ കഴിവുകള്‍ വളര്‍ത്തുക എന്നീ ലക്ഷ്യങ്ങളോടെ ജീവനക്കാരുടെ പരിശ്രമങ്ങളെ അംഗീകരിക്കാനും അവരെ വിലമതിക്കാനുമുള്ള ജി.ഡി.ആര്‍.എഫ്.എയുടെ തുടര്‍ പ്രവര്‍ത്തനങ്ങളുടെ ഭാഗമായിട്ടായിരുന്നു ചടങ്ങ് സംഘടിപ്പിച്ചത്.

2023ലെ ദുബൈ സര്‍ക്കാര്‍ ജീവനക്കാരുടെ സന്തോഷ സൂചികയില്‍ ഒന്നാം സ്ഥാനം നേടിയതിന്റെ ഭാഗമായി എല്ലാ ജീവനക്കാര്‍ക്കും ഹാപിനസ് ബാഡ്ജുകള്‍ സമ്മാനിച്ചു. ജോലിയില്‍ തൃപ്തിയും ജീവനക്കാരുടെ സന്തോഷവും വളര്‍ത്തുന്ന ക്രിയാത്മകമായ ജോലി സാഹചര്യം സൃഷ്ടിക്കാനുള്ള ജി.ഡി.ആര്‍.എഫ്.എയുടെ പ്രതിബദ്ധതയുടെ ഭാഗമായിട്ടാണ് ബാഡ്ജുകള്‍ അണിയിച്ചതെന്ന് ഡയരക്ടറേറ്റ് അറിയിച്ചു.

മുഴുവന്‍ ജീവനക്കാരുടെയും പരിശ്രമങ്ങളെയും കഠിനാധ്വാനത്തെയും പ്രശംസിക്കന്നതിന്റെ പ്രാധാന്യം ലഫ്.ജനറല്‍ മുഹമ്മദ് അഹ്മദ് അല്‍ മര്‍റി എടുത്തു പറഞ്ഞു. ജീവനക്കാരുടെ സംഭാവനകളെ മാനിക്കുകയും പിന്തുണയ്ക്കുകയും പ്രോത്സാഹിപ്പിക്കുകയും ചെയ്യുന്ന പ്രൊഫഷണല്‍ അന്തരീക്ഷം പ്രോത്സാഹിപ്പിക്കാന്‍ ജി.ഡി.ആര്‍.എഫ്.എ പ്രതിജ്ഞാബദ്ധമാണെന്ന് അല്‍ മര്‍റി കൂട്ടിച്ചേര്‍ത്തു.