ലഖ്‌നൗ: നാല് മക്കളയുംകൊണ്ട് ട്രെയിനിന് മുന്നില്‍ ചാടി ആത്മഹത്യ ചെയ്ത് യുവാവ്. ഫരീദാബാദിലെ ബല്ലാഗഡിലാണ് നാടിനെ നടുക്കിയ സംഭവം. 3 വയസ്സിനും 9 വയസ്സിനും ഇടയിലുള്ള നാല് ആണ്‍മക്കളയുംകൊണ്ടാണ് യുവാവ് ട്രെയിന് മുന്നില്‍ ചാടി ജീവനൊടുക്കിയത്. മക്കളെയും കൊണ്ട് റെയില്‍വേ ട്രാക്കിലേക്ക് ഇറങ്ങിയ സമയത്ത് ട്രെയിന്‍ വരുന്നത് കണ്ട് രക്ഷപ്പെടാന്‍ ശ്രമിച്ച മകനെ ഇയാള്‍ രക്ഷപ്പെടാന്‍ അനുവദിച്ചില്ലെന്ന് ദൃക്‌സാക്ഷികളെ ഉദ്ദരിച്ച് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.

മക്കളോടൊപ്പം ഗോള്‍ഡന്‍ ടെംപിള്‍ എക്‌സ്പ്രസിന് മുന്നില്‍ ചാടിയാണ് യുവാവ് ജീവനൊടുക്കിയത്. ബീഹാര്‍ സ്വദേശിയാണ് മനോജ്. ഇയാളുടെ പോക്കറ്റില്‍ നിന്ന് ലഭിച്ച ആദാര്‍ കാര്‍ഡില്‍ നിന്നാണ് ഇയാളെ തിരിച്ചറിഞ്ഞത്. സുഭാഷ് കോളനിയിലെ വീട്ടില്‍ നിന്ന് അടുത്തുള്ള പാര്‍ക്കിലേക്ക് പറഞ്ഞാണ് ഇയാള്‍ മക്കളെ കൂട്ടിക്കൊണ്ടുപോയത്. എന്നാല്‍ പാര്‍ക്കിലേക്ക് പോകുന്നതിന് പകരം എല്‍സണ്‍ ചൗക്കിലെ ഫ്‌ലൈ ഓവറിന് താഴെ കുറേ നേരം കാത്തുനിന്ന ശേഷം ഇവര്‍ ട്രെയിനിന് മുന്നിലേക്ക് ചാടുകയായിരുന്നു. രണ്ട് മക്കളെ ചുമലിലേറ്റിയും മറ്റു രണ്ടു മക്കളെ ഓരോ കൈയിലും പിടിച്ചാണ് മനോജ് ട്രാക്കിലേക്ക് എത്തിയത്. ഹോണ്‍ മുഴക്കിയിട്ടും ഇയാള്‍ ട്രാക്കില്‍ മാറാന്‍ തയ്യാറായില്ലെന്ന് ലോക്കോ പൈലറ്റ് പറഞ്ഞു.

മക്കള്‍ക്ക് കോളയും മറ്റും വാങ്ങിനല്കിയ ശേഷമാണ് ഇയാള്‍ മക്കളെയും കൊണ്ട് ജീവനൊടുക്കിയത്. സംഭവസ്ഥലത്തു നിന്നു ലഭിച്ച കുറിപ്പില്‍ മനോജിന്റെ ഭാര്യ പ്രിയയുടെ നമ്പറുണ്ടായിരുന്നു. തുടര്‍ന്ന് പ്രിയ സ്ഥലത്തെത്തി മൃതദേഹങ്ങള്‍ തിരിച്ചറിയുകയായിരുന്നു. മൃതദേഹങ്ങള്‍ കണ്ട പ്രിയ സ്ഥലത്ത് ബോധംകെട്ട് വീണു. ദമ്പതികള്‍ക്കിടയില്‍ വഴക്ക് പതിവായിരുന്നെന്ന് പൊലിസ് വ്യക്തമാക്കി.