തിരുവനന്തപുരം: കെനിയയിൽ ടൂറിസ്റ്റ് ബസ് മറിഞ്ഞുണ്ടായ അപകടത്തിൽ മരിച്ച അഞ്ച് മലയാളികളുടെ മൃതദേഹങ്ങൾ നാട്ടിലെത്തിക്കാൻ അടിയന്തര നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയൻ കേന്ദ്ര വിദേശകാര്യ മന്ത്രി എസ്. ജയ്ശങ്കറിന് കത്തയച്ചു. പരുക്കേറ്റവർക്ക് നെയ്റോബിയിൽ മതിയായ ചികിത്സ ഉറപ്പാക്കണമെന്നും അപകടത്തിൽപ്പെട്ടവരുടെ കുടുംബങ്ങൾക്ക് ആവശ്യമായ പിന്തുണ നൽകണമെന്നും മുഖ്യമന്ത്രി കത്തിൽ വ്യക്തമാക്കി.

അപകട സമയത്ത് ഉടൻ ഇടപെട്ട നെയ്റോബിയിലെ ഇന്ത്യൻ ഹൈക്കമ്മിഷന് മുഖ്യമന്ത്രി നന്ദി അറിയിച്ചു. ഖത്തറിൽ നിന്ന് വിനോദയാത്രയ്ക്കായി കെനിയയിലെത്തിയ 14 മലയാളികൾ ഉൾപ്പെട്ട സംഘമാണ് അപകടത്തിൽപ്പെട്ടത്. വടക്കുകിഴക്കൻ കെനിയയിലെ ന്യാൻഡറുവ പ്രവിശ്യയിൽ ശക്തമായ മഴയിൽ വാഹനം നിയന്ത്രണം വിട്ട് മറിയുകയായിരുന്നു.

മരിച്ചവരുടെ മൃതദേഹങ്ങൾ രണ്ട് ദിവസത്തിനകം നാട്ടിലെത്തിക്കാൻ ബന്ധുക്കളും കെനിയയിലെ മലയാളി സംഘടനകളും ശ്രമം തുടരുന്നു. അപകടസ്ഥലത്തിനടുത്തുള്ള മൂന്ന് ആശുപത്രികളിൽ ചികിത്സയിലായിരുന്നവരെ കെനിയയുടെ തലസ്ഥാനമായ നെയ്റോബിയിലെ ആശുപത്രിയിലേക്ക് മാറ്റി.