തിരുവനന്തപുരം: ഒടുവില്‍ വിഴിഞ്ഞം തുറമുഖം യാഥാര്‍ഥ്യമായി. തുറമുഖത്തിന്റെ ട്രയല്‍ റണ്‍ ഉദ്ഘാടനം മുഖ്യമന്ത്രി പിണറായി വിജയന്‍ നിര്‍വഹിച്ചു. വിഴിഞ്ഞം പദ്ധതിയിലൂടെ ഇന്ത്യ ലോകഭൂപടത്തില്‍ ഇടംപിടിച്ചെന്ന് മുഖ്യമന്ത്രി പറഞ്ഞു. വികസന അധ്യായത്തിന്റെ പുതിയ ഏടെന്ന് വിശേഷിപ്പിച്ച അദ്ദേഹം ഏറെ അഭിമാനകരമായ നേട്ടമെന്നും കൂട്ടിച്ചേര്‍ത്തു.

കേന്ദ്രമന്ത്രി സര്‍ബാനന്ദ സോനോവാള്‍ ചടങ്ങില്‍ മുഖ്യാതിഥിയായിരുന്നു. തുറമുഖത്ത് എത്തിയ ആദ്യ മദര്‍ ഷിപ്പ് സാന്‍ ഫെര്‍ണാണ്ടോയുടെ സ്വീകരിച്ചാനയിക്കുന്ന ചടങ്ങും നടന്നു. പ്രതിപ്രതിഷേധങ്ങള്‍ക്കിടെയായിരുന്നു ചടങ്ങുകള്‍. തുറമുഖ മന്ത്രി വി.എന്‍ വാസവന്‍ ചടങ്ങില്‍ അധ്യക്ഷനായിരുന്നു. 

ഇപ്പോള്‍ നടക്കുന്നത് ട്രയല്‍ റണ്‍ ആണെങ്കിലും വിഴിഞ്ഞം തുറമുഖത്തിന്റെ പ്രവര്‍ത്തനം ഇതോടെ ആരംഭിക്കുകയാണ്. പൂര്‍ണ്ണതോതിലുള്ള പ്രവര്‍ത്തനം ഉടന്‍ ആരംഭിക്കും. 2028ഓടെ വിഴിഞ്ഞം സമ്പൂര്‍ണ തുറമുഖമായി മാറുമെന്ന് മുഖ്യമന്ത്രി പറഞ്ഞു. 

അദാനിയെ വാഴ്ത്തിയായിരുന്നു മുഖ്യമന്ത്രിയുടെ പ്രസംഗം. അദാനി ഗ്രൂപ്പിന്റെ പ്രതിബദ്ധത നല്ലരീതിയില്‍ പ്രവര്‍ത്തനം മുന്നോട്ടുകൊണ്ടുപോയി. പദ്ധതി പൂര്‍ത്തിയാക്കാന്‍ കാണിച്ച സഹകരണത്തിന് ചടങ്ങില്‍ സന്നിഹിതനായിരുന്ന കരണ്‍ അദാനിക്ക് മുഖ്യമന്ത്രി നന്ദി പറഞ്ഞു. അതേസമയം, മുന്‍ മുഖ്യമന്ത്രിയെ കുറിച്ച് അദ്ദേഹം മൗനം പാലിച്ചു. 

വിഴിഞ്ഞം പദ്ധതി പൂര്‍ത്തിയാക്കുന്നതിക്കുന്നതിനായി മുന്‍തുറമുഖ വകുപ്പ് മന്ത്രിമാരായിരുന്ന രാമചന്ദ്രന്‍ കടന്നപ്പള്ളിയും അഹമ്മദ് ദേവര്‍കോവിലും മികച്ച പ്രവര്‍ത്തനമാണ് കാഴ്ചവെച്ചതെന്നും മുഖ്യമന്ത്രി പറഞ്ഞു. പദ്ധതി യാഥാര്‍ത്ഥ്യമായത് ഇടതുപക്ഷത്തിന്റെ ഇച്ഛാശക്തി കൊണ്ടെന്ന് ചടങ്ങില്‍ അധ്യക്ഷനായിരുന്ന തുറമുഖ മന്ത്രി വി എന്‍ വാസവന്‍ പറഞ്ഞു. ചടങ്ങില്‍ സംസ്ഥാനത്തെ അഞ്ച് മന്ത്രിമാരും എംപിമാരും എംഎല്‍എമാരും അദാനി ഗ്രൂപ്പ് ഡയറക്ടര്‍ കരണ്‍ അദാനിയും പങ്കെടുത്തു.