കൊച്ചി: കണ്ണൂരിൽ കനത്ത മഴയെ തുടർന്ന് വിമാനം ലാൻഡ് ചെയ്യാൻ സാധിച്ചില്ല. പ്രതികൂല കാലാവസ്ഥയെ തുടർന്ന് കണ്ണൂരിൽ ഇറക്കേണ്ട വിമാനം കൊച്ചിയിൽ ഇറക്കി. കുവൈത്തിൽ നിന്ന് കണ്ണൂരിലേക്ക് വന്ന എയർ ഇന്ത്യ എക്സ്പ്രസ് വിമാനമാണ് നെടുമ്പാശ്ശേരിയിൽ ഇറക്കിയത്. വിമാനം കൊച്ചിയിൽ ഇറക്കിയെങ്കിലും യാത്രക്കാരെ വിമാനത്തിൽ നിന്ന് ഇറക്കിയിട്ടില്ല. കാലാവസ്ഥ അനുകൂലമായാൽ വിമാനം കണ്ണൂരിലേക്ക് തിരിച്ചെത്തിക്കും. പക്ഷേ അത് എപ്പോഴാണെന്ന് ഇപ്പോൾ വ്യക്തമല്ല.   

കണ്ണൂരിൽ കനത്ത മഴയാണ് തുടരുന്നത്. കേന്ദ്ര കാലാവസ്ഥ വകുപ്പിന്റെ പുതിയ റിപ്പോർട്ട് പ്രകാരം കണ്ണൂർ ജില്ലയിൽ അതിതീവ്ര മഴയ്ക്കാണ് സാധ്യത. ജില്ലയിൽ റെഡ് അലർട്ട് പ്രഖ്യാപിച്ചിട്ടുണ്ട്. വയനാടിന് പുറമെയാണ് കണ്ണൂരിലും റെഡ് അലർട്ട്. മറ്റു എട്ട് ജില്ലകളിൽ ഓറഞ്ച് അലർട്ടും നാലിടത്ത് യെല്ലോ അലർട്ടും പ്രഖ്യാപിച്ചിട്ടുണ്ട്.

അതേസമയം, കനത്ത മഴയിൽ കണ്ണൂർ അഞ്ചരക്കണ്ടിയിൽ മതിൽ ഇടിഞ്ഞുവീണു. മദ്രസ വിട്ട് വിദ്യാർഥികൾ നടന്നുവരുന്നതിനിടെയാണ് മതിൽ ഇടിഞ്ഞ് റോഡിലേക്ക് വീണത്. വിദ്യാർഥികൾ ഭാഗ്യം കൊണ്ടുമാത്രമാണ് രക്ഷപ്പെട്ടത്. അഞ്ചരക്കണ്ടി ജുമാ മസ്ജിദിന്റെ മതിലാണ് കനത്ത മഴയിൽ ഇടിഞ്ഞുവീണത്.