ഭോപ്പാല്‍: മധ്യപ്രദേശിലെ സാഗര്‍ ജില്ലയില്‍ ഇന്ന് രാവിലെ മതില്‍ ഇടിഞ്ഞുവീണ് 9 കുട്ടികള്‍ മരിച്ചു. നിരവധി പേര്‍ക്ക് പരുക്കേറ്റു. ഷാഹ് പുരിലെ ഹര്‍ദൗള്‍ ബാബ ക്ഷേത്രത്തിന്  സമീപമാണ് ദാരുണമായ സംഭവം. പരുക്കേറ്റ കുട്ടികളെ ആശുപത്രിയില്‍ പ്രവേശിപ്പിച്ചു. 

ക്ഷേത്രത്തില്‍ ചടങ്ങിന്റെ ഭാഗമായി കുട്ടികള്‍ ശിവലിംഗങ്ങള്‍ നിര്‍മിക്കുന്നതിനിടെ സമീപത്തുണ്ടായിരുന്ന വീടിന്റെ മതില്‍ ഇടിഞ്ഞ് വീഴുകയായിരുന്നു. പ്രദേശത്ത് പെയ്ത കനത്ത മഴയില്‍ കുതിര്‍ന്ന 50 വര്‍ഷം പഴക്കമുള്ള മതിലാണ് തകര്‍ന്നുവീണത്. 

10 നും 15 നും ഇടയില്‍ പ്രായമുള്ള കുട്ടികളാണ് അപകടത്തില്‍പെട്ടത്. രക്ഷാപ്രവര്‍ത്തനങ്ങള്‍ക്ക് മേല്‍നോട്ടം വഹിക്കാന്‍ എംഎല്‍എയും മുന്‍ മന്ത്രി ഗോപാല്‍ ഭാര്‍ഗവയും സ്ഥലത്തെത്തി.  മുഖ്യമന്ത്രി മോഹന്‍ യാദവ്  അനുശോചനം രേഖപ്പെടുത്തി.