ന്യൂഡല്‍ഹി: പാരിസ് ഒളിമ്പിക്സില്‍ ഇന്ത്യന്‍ ഹോക്കി ടീമിന് വെങ്കലമെഡല്‍ സമ്മാനിച്ച് വിരമിച്ച മലയാളി താരം പി.ആര്‍ ശ്രീജേഷ് ഇന്ത്യന്‍ ജൂനിയര്‍ ഹോക്കി ടീമിന്റെ പരിശീലകനാകും. ഹോക്കി ഇന്ത്യയാണ് പ്രഖ്യാപനം നടത്തിയത്. ഇതിഹാസ താരം മറ്റൊരു ഇതിഹാസ തീരുമാനത്തിലേക്കെന്നാണ് ഹോക്കി ഇന്ത്യ സോഷ്യല്‍ മീഡിയില്‍ കുറിച്ചത്.

'ഇതിഹാസം മറ്റൊരു ഐതിഹാസിക ചുവടിലേക്ക്. പുരുഷ ജൂനിയര്‍ ഹോക്കി ടീമിന്റെ മുഖ്യ പരിശീലകനായി പി.ആര്‍. ശ്രീജേഷിനെ നിയമിച്ചിരിക്കുന്നു.കളിക്കുന്നത് മുതല്‍ പരിശീലനംവരെ നിങ്ങള്‍ എല്ലാ യുവാക്കളെയും പ്രചോദിപ്പിക്കുന്നു. ഇനി കോച്ചിങിലേക്ക് നോക്കു..' ഹോക്കി ഇന്ത്യ ഇന്‍സ്റ്റഗ്രാമില്‍ കുറിച്ചു. 

ഇന്ത്യക്കായി 2006ല്‍ അരങ്ങേറിയ ശ്രീജേഷ് 336 തവണ ഇന്ത്യന്‍ ജേഴ്‌സിയണിഞ്ഞു. ശ്രീജേഷിന്റെ ആദ്യ ഒളിമ്പിക്സ് 2012ല്‍ ലണ്ടനിലാണ്. 2016 റിയോ ഒളിമ്പിക്സില്‍ ഇന്ത്യന്‍ ക്യാപ്റ്റനായി. കഴിഞ്ഞതവണ ടോക്യോയില്‍ വെങ്കലം നേടിയ ടീമില്‍ അംഗമായിരുന്നു.