കൊച്ചി: സിനിമാ മേഖലയിലെ സ്ത്രീകളുടെ പ്രശ്‌നങ്ങൾ പഠിച്ച ഹേമ കമ്മിറ്റി റിപ്പോർട്ട് പുറത്തുവിടണോ എന്നതിൽ ഹൈക്കോടതി ഇന്ന് വിധി പറയും. റിപ്പോർട്ടിൻറെ ഉളളടക്കം പുറത്തുവിടരുതെന്ന് ആവശ്യപ്പെട്ട് നിർമാതാവ് സജിമോൻ പാറയിൽ നൽകിയ ഹരജിയിലാണ് ഹൈക്കോടതി വിധി പറയുക. ജസ്റ്റിസ് വി.ജി അരുണാണ് ഉച്ചയ്ക്ക് രണ്ടുമണിയ്ക്ക് ഹരജിയിൽ വിധി പറയുക.

റിപ്പോർട്ട് പുറത്തുവിടുന്നത് വ്യക്തികളുടെ സ്വകാര്യതയെ പ്രതികൂലമായി ബാധിക്കുമെന്നാണ് ഹരജിക്കാരൻ ഉന്നയിക്കുന്ന വാദം. ആരോപണ വിധേയരായവരുടെ ഭാഗം കേൾക്കാതെയാണ് റിപ്പോർട്ട് തയാറാക്കിയതെന്നും സജിമോൻ ഹരജിയിൽ ചൂണ്ടിക്കാണിക്കുന്നു. എന്നാൽ ഹരജിക്കാരന് ഇക്കാര്യത്തിൽ ചോദ്യം ചെയ്യാനുള്ള നിയമപരമായ അവകാശമില്ലെന്നാണ് വിവരാവകാശ കമ്മീഷന്റെ നിലപാട്. വ്യക്തിപരമായ പരാമർശങ്ങൾ ഒഴിവാക്കി റിപ്പോർട്ട് പ്രസിദ്ധീകരിക്കാമെന്ന നിലപാടാണ് വിവരാവകാശ കമ്മിഷനും സംസ്ഥാന സാംസ്കാരിക വകുപ്പും കോടതിയിൽ സ്വീകരിച്ചത്. 

സിനിമയിലെ സ്ത്രീകളുടെ കൂട്ടായ്മയായ വിമൻ ഇൻ സിനിമ കളക്ടീവും (ഡബ്ള്യൂ.സി.സി) വനിതാ കമ്മിഷനും ഹരജിയിൽ കക്ഷി ചേർന്നിരുന്നു. റിപ്പോർട്ട് പുറത്തുവിടണമെന്ന് ഡബ്ള്യൂ.സി.സി കോടതിയിൽ ആവശ്യപ്പെട്ടിട്ടുണ്ട്. ഹരജിക്കാരൻ്റെ നടപടി ഏറെ സംശയാസ്പദമെന്നാണ് ഡബ്ള്യൂ.സി.സി കോടതിയിൽ വാദിച്ചത്.

The Kerala High Court will deliver its verdict today on whether to release the Hema Committee report, which studied issues faced by women in the film industry