യൂട്യൂബില്‍ പരസ്യങ്ങളില്ലാതെ വീഡിയോകളും, സിനിമകളും ആസ്വദിക്കണമെങ്കില്‍ ഇനി പോക്കറ്റ് കീറും. യൂട്യൂബ് വ്യക്തിഗത, ഫാമിലി സബ്‌സ്‌ക്രിപ്ഷന്‍ പ്ലാനുകളുടെ നിരക്ക് കുത്തനെ ഉയര്‍ത്തി.

വ്യക്തിഗത ഉപയോക്താക്കള്‍ക്ക് പ്രതിമാസം 129 രൂപ ഈടാക്കിയിരുന്നത് ഇപ്പോള്‍ 149 രൂപയാക്കി ഉയര്‍ത്തി. യൂട്യൂബ് പ്രീമിയം കണ്ടന്റുകള്‍ അഞ്ച് പേര്‍ക്ക് ഷെയര്‍ ചെയ്ത് ഉപയോഗിക്കാവുന്ന ഫാമിലി പ്ലാന്‍ നിരക്ക് 299 രൂപയാക്കി വര്‍ധിപ്പിച്ചു. മുന്‍പ് ഇത് 189 രൂപ ആയിരുന്നു. സ്റ്റുഡന്റ്‌റ് പ്ലാന്‍ നിരക്ക് 79 രൂപയില്‍ നിന്ന് 10 രൂപ വര്‍ധിപ്പിച്ച് 89 രൂപയാക്കി. പരസ്യങ്ങളുടെ ശല്യമില്ലാതെ യൂട്യൂബ് സേവനങ്ങള്‍ ആസ്വദിക്കാനുള്ള ഏറ്റവും ചെലവു കുറഞ്ഞ മാര്‍ഗമായി ഇതോടെ സ്റ്റുഡന്റ് പ്ലാനുകള്‍ മാറി.

പ്രീപെയ്ഡ് പ്ലാനുകളെയും നിരക്ക് വര്‍ധന ബാധിക്കും. പ്രീപെയ്ഡ് പ്ലാനുകള്‍ക്കുള്ള പ്രതിമാസ നിരക്ക് 139 രൂപയില്‍ നിന്ന് 159 രൂപയായും ത്രൈമാസ നിരക്ക് 399 രൂപയില്‍ നിന്ന് 459 രൂപയായും ഉയര്‍ത്തിയിട്ടുണ്ട്. 1,290 രൂപയായിരുന്ന വാര്‍ഷിക പ്ലാനുകളുടെ നിരക്ക് 1,490 രൂപയാക്കി വര്‍ധിപ്പിച്ചു. 

പ്രീമിയം സബ്‌സ്‌ക്രൈബര്‍മാര്‍ക്ക് ആഡ്ഫ്രീ വീഡിയോ, ബാക്ക്ഗ്രൗണ്ടില്‍ വീഡിയോ കാണാനും സംഗീതം ആസ്വദിക്കാനുമുള്ള സൗകര്യം. പിക്ചര്‍ ഇന്‍ പിക്ചര്‍ മോഡ്, ഹൈഡെഫനിഷന്‍ വീഡിയോ സ്ട്രീമിംഗ് തുടങ്ങിയ സൗകര്യങ്ങളാണ് ലഭിക്കുക. പുതുക്കിയ നിരക്കുകള്‍ കമ്പനി വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്. പ്രീമിയം പ്ലാനുകളുടെ ട്രയല്‍ നോക്കി പുതിയ ഉപയോക്താക്കള്‍ക്ക് സ്ട്രീമിംഗ് സേവനം തിരഞ്ഞെടുക്കാം. ട്രയല്‍ കാലാവധി കഴിഞ്ഞാല്‍ പുതുക്കിയ നിരക്കുകള്‍ നല്‍കേണ്ടി വരും.

YouTube has increased the premium content rate, resulting in a higher subscription fee for users. Learn more about the price hike and its impact on viewers.