മുംബൈ: വിഖ്യാത അഭിഭാഷകനും കോളമിസ്റ്റും ഭരണഘടനാ വിദഗ്ധനുമായ എ.ജി നൂറാനി എന്ന അബ്ദുല്‍ ഗഫൂര്‍ മജീദ് നൂറാനി (94) അന്തരിച്ചു. വാര്‍ധക്യസഹജമായ അസുഖങ്ങളാല്‍ ചികിത്സയിലിരിക്കെയാണ് മരണം. 1930ല്‍ മുംബൈയിലാണ് ജനനം.

രാജ്യത്തെ മുന്‍നിര ഇംഗ്ലീഷ് മാധ്യമങ്ങളിൽ പതിവ് കോളമിസ്റ്റായിരുന്ന നൂറാനി, 'ആര്‍.എസ്.എസ് ഇന്ത്യക്ക് ഭീഷണി' എന്നത് ഉൾപ്പെടെ ഒരു ഡസനോളം പുസ്തകങ്ങൾ എഴുതിയിട്ടുണ്ട്. ഏതാനും പുസ്തകങ്ങള്‍ മലയാളത്തിലും ലഭ്യമാണ്. സ്വാതന്ത്ര്യസമര സേനാനിയും നിയമജ്ഞനുമായിരുന്ന ബദ്‌റുദ്ദീന്‍ തിയാബ്ജി, മുന്‍ രാഷ്ട്രപതി ഡോ. സാക്കിര്‍ ഹുസൈന്‍ എന്നിവരുടെ ജീവചരിത്രവും നൂറാനിയാണ് എഴുതിയത്.

ദേശീയതലത്തില്‍ കോളിളക്കം സൃഷ്ടിച്ച വിവിധ കേസുകളില്‍ ഹാജരാകുകയും ചെയ്തു. നിയമ, രാഷ്ട്രീയ, രാഷ്ട്രനിര്‍മാണരംഗത്ത് അഗാധ പാണ്ഡിത്യമുണ്ടായിരുന്നു. ഇന്ത്യന്‍ ബൗദ്ധിക, നിയമരംഗത്തെ ഒരുയുഗത്തിന്റെ അന്ത്യമാണ് ഹിന്ദുത്വ രാഷ്ട്രീയത്തിനെതിരേ നിരന്തരം കലഹിച്ച നൂറാനിയുടെ മരണത്തോടെ സംഭവിച്ചിരിക്കുന്നത്.