ഹൈദരാബാദ്: ആന്ധ്രപ്രദേശിലെ കനത്ത മഴയെ തുടര്‍ന്ന് ചില ട്രെയിന്‍ സര്‍വീസുകള്‍ പൂര്‍ണമായും റദ്ദാക്കുകയും മറ്റ് ചിലത് വഴി തിരിച്ചുവിടുകയും ചെയ്തു. കേരളത്തിലൂടെ ഓടുന്നവയില്‍ ശബരി എക്‌സ്പ്രസാണ് പൂര്‍ണമായി റദ്ദാക്കിയത്. 

സെക്കന്ദരാബാദില്‍നിന്ന് ഇന്ന് (01.09.2024) പുറപ്പെടേണ്ടിയിരുന്ന നമ്പര്‍ 17230 സെക്കന്ദരാബാദ്- തിരുവനന്തപുരം ശബരി എക്സ്പ്രസ് ട്രെയിന്‍ സര്‍വീസ് റദ്ദാക്കി.

സെപ്റ്റംബര്‍ മൂന്നിന് തിരുവനന്തപുരത്തുനിന്ന് സെക്കന്ദരാബാദിലേക്ക് പുറപ്പെടേണ്ടിയിരുന്ന നമ്പര്‍ 17229 തിരുവനന്തപുരം സെന്‍ട്രല്‍-സെക്കന്ദരാബാദ് ശബരി എക്‌സ്പ്രസ് ട്രെയിന്‍ സര്‍വീസും റദ്ദാക്കി. 

വഴിതിരിച്ചുവിടുന്ന ട്രെയിനുകള്‍

1. ഓഗസ്റ്റ് 31ന് ന്യൂഡല്‍ഹിയില്‍ നിന്ന് പുറപ്പെട്ട, തിരുവനന്തപുരത്തേക്കുള്ള കേരള എക്‌സ്പ്രസ് നാഗ്പൂരിനും വിജയവാഡയ്ക്കും ഇടയിലുള്ള സ്റ്റോപ്പുകള്‍ ഒഴിവാക്കി വിജയനഗരം വഴി തിരിച്ചുവിടും.

2. ഓഗസറ്റ് 31ന് കോര്‍ബയില്‍ നിന്ന് പുറപ്പെട്ട കോര്‍ബ - കൊച്ചുവേളി എക്‌സ്പ്രസ് വാറങ്കല്‍, ആര്‍ക്കോണം വഴി തിരിച്ചുവിടും.

3. ഓഗസ്റ്റ് 31ന് എറണാകുളത്ത് നിന്ന് പുറപ്പെട്ട പാറ്റ്‌ന ജംഗ്ഷന്‍ സൂപ്പര്‍ ഫാസ്റ്റ് എക്‌സ്പ്രസ് വിജയവാഡയ്ക്കും നാഗ്പൂരിനും ഇടയ്ക്ക് വഴിതിരിച്ചു വിടും.