കൊച്ചി: സംസ്ഥാന സര്‍ക്കാരിന്റെ കെ ഫോണ്‍ പദ്ധതിയില്‍ അഴിമതി ആരോപിച്ച് പ്രതിപക്ഷ നേതാവ് വിഡി സതീശന്‍ സമര്‍പ്പിച്ച ഹരജി തള്ളി ഹൈക്കോടതി. പദ്ധതിയുമായി ബന്ധപ്പെട്ട് അഴിമതി നടന്നുവെന്നും സി.ബി.ഐ അന്വേഷണത്തിന് ഉത്തരവിടണമെന്നും ആവശ്യപ്പെട്ടായിരുന്നു ഹരജി. ജസ്റ്റിസുമാരായ എ.കെ ജയശങ്കരന്‍ നമ്പ്യാര്‍, വി ശ്യാംകുമാര്‍ എന്നിവരടങ്ങുന്ന ബെഞ്ചാണ് വിധി പറഞ്ഞത്. 

കരാറിന് പിന്നിലെ ആസൂത്രിത അഴിമതി അന്വേഷിക്കണമെന്നും ഹരജിയില്‍ വി.ഡി സതീശന്‍ ആവശ്യപ്പെട്ടിരുന്നു. എന്നാല്‍ കെ ഫോണില്‍ ക്രമക്കേടോ, നിയമവിരുദ്ധതയോ കണ്ടെത്താനായിട്ടില്ലെന്ന് ഹൈക്കോടതി ഡിവിഷന്‍ ബെഞ്ച് നിരീക്ഷിച്ചു.

നേരത്തെ ഹരജി പരിഗണിക്കുമ്പോള്‍ കോടതി പ്രതിപക്ഷ നേതാവിനെ വിമര്‍ശിച്ചിരുന്നു. ഹരജിയ്ക്ക് പിന്നിലെ താത്പര്യം പൊതു താത്പര്യമാണോ പബ്ലിസിറ്റിയാണോയെന്നായിരുന്നു കോടതി ചോദിച്ചത്. ലോകായുക്തയ്ക്കെതിരെ പ്രതിപക്ഷ നേതാവ് ഉന്നയിച്ച ആരോപണങ്ങളും ഇതേ തുടര്‍ന്ന് പിന്‍വലിക്കേണ്ടി വന്നിരുന്നു.