നെഞ്ചെരിച്ചിലും ഹൃദയാഘാതവും ഏകദേശം ഒരുപോലെ വേദനയുണ്ടാക്കുന്നതിനാല്‍ പലര്‍ക്കും ഇവ രണ്ടും തമ്മിലുള്ള വ്യത്യാസം പലപ്പോഴും തിരിച്ചറിയാന്‍ പ്രയാസമുണ്ടാക്കുന്നതാണ്. ഇതു കാരണം ചികിത്സ വൈകാനും അനാവശ്യ ടെന്‍ഷന്‍ ഉണ്ടാകുവാനും കാരണമാകുന്നു.

വയറില്‍ നിന്ന് അന്നനാളിയിലൂടെ ദഹനരസങ്ങള്‍ തിരിച്ചു കയറി വരുന്ന ആസിഡ് റീഫ്ളക്സ് കാരണമായുണ്ടാകുന്നതാണ് നെഞ്ചെരിച്ചില്‍. സാധാരണയായി ഭക്ഷണം കഴിച്ചതിന് ശേഷമാണ് നെഞ്ചെരിച്ചില്‍ ഉണ്ടാവുന്നത്. ഇത് കിടക്കുമ്പോഴോ കുനിയുമ്പോഴോ ഒക്കെ തീവ്രമായേക്കാം.

എന്നാല്‍, ഹൃദയത്തിലേക്കുള്ള രക്തയോട്ടം ഹൃദയപേശികളുടെ ക്ഷതം കൊണ്ട് നിന്നുപോകുന്ന സാഹചര്യമാണ് ഹൃദയാഘാതം. ഈ സമയം നെഞ്ചിലോ കൈകളിലോ സമ്മര്‍ദമോ മുറുക്കമുള്ളതായോ വേദന അല്ലെങ്കില്‍ ഞെരുക്കം അനുഭവപ്പെടാം. ചിലരില്‍ ശ്വാസതടസ്സവും വിയര്‍പ്പും ഓക്കാനവും തലകറക്കവുമൊക്കെ ഉണ്ടാകാം. ഹൃദയാഘാതം ഏത് പ്രായക്കാരിലും എപ്പോള്‍ വേണമെങ്കിലും ഉണ്ടാകാവുന്നതാണ്.

പുകവലി, പ്രമേഹം, ഹൈപ്പര്‍ടെന്‍ഷന്‍ എന്നിവയുള്ളവരില്‍ ഹൃദയാഘാത സാധ്യത വളരെയധികം കൂടുതലാണ്. സമയം തെറ്റിയ ഭക്ഷണം കഴിക്കല്‍, എണ്ണ അധികമുള്ള ഭക്ഷണം, കാപ്പി, മദ്യം എന്നിവ ആസിഡ് റീഫ്‌ലക്സിലേക്ക് നയിച്ചേക്കാം. ആരോഗ്യകരമായ ഭക്ഷണക്രമം ഒരു പരിധി വരെ ആസിഡ് റീഫ്‌ളക്‌സ് കുറയ്ക്കുന്നതാണ്.

തിരിച്ചറിയാനുള്ള ചില വഴികള്‍

പൊസിഷന്‍ മാറുന്നത് നെഞ്ചെരിച്ചില്‍ ഒഴിവാക്കുന്നതാണ്.

ഹൃദയാഘാത സമയത്ത് സ്ത്രീകള്‍ക്കാണെങ്കില്‍ ഓക്കാനവും ക്ഷീണവും അനുഭവപ്പെടാം. പ്രായമായ ആളുകള്‍ക്ക് തളര്‍ച്ച, ശ്വാസംമുട്ടല്‍, വിയര്‍പ്പ് എന്നിവയും അനുഭവപ്പെടാം.