കൊല്‍ക്കത്ത: ആര്‍.ജി കര്‍ ആശുപത്രിയില്‍ പി.ജി. ഡോക്ടറെ ബലാത്സംഗം ചെയ്ത് കൊലപ്പെടുത്തിയ സംഭവത്തില്‍ പ്രതിഷേധിക്കുന്ന ഡോക്ടര്‍മാരെ വീണ്ടും ചര്‍ച്ചക്ക് വിളിച്ച് മമത ബാനര്‍ജി. ഇത് അഞ്ചാം തവണയാണ് ഡോക്ടര്‍മാരെ പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജി സമരം നിര്‍ത്തിവെക്കണമെന്ന് ആവശ്യപ്പെട്ട് ചര്‍ച്ചക്ക് വിളിക്കുന്നത്. ഇത്തവണ അവസാന ക്ഷണമാണ് മമത ബാനര്‍ജി നടത്തുന്നതെന്നും മാധ്യമങ്ങള്‍ റിപ്പോര്‍ട്ട് ചെയ്യുന്നു.

കൊല്‍ക്കത്തയിലെ കാളിഘട്ടിലെ തന്റെ വസതിയിലേക്കാണ് മമത ബാനര്‍ജി ജൂനിയര്‍ ഡോക്ടര്‍മാരെ ക്ഷണിച്ചത്. വൈകീട്ട് അഞ്ചുമണിക്കാണ് കൂടിക്കാഴ്ച നിശ്ചയിച്ചിരിക്കുന്നത്. ബംഗാള്‍ ചീഫ് സെക്രട്ടറിയാണ് മുഖ്യമന്ത്രിക്കു വേണ്ടി ഡോക്ടര്‍മാര്‍ക്ക് കത്തയച്ചത്.

മമത ബാനര്‍ജിയുടെ ക്ഷണം സ്വീകരിക്കണമോയെന്ന് ഡോക്ടര്‍മാര്‍ ഇന്നു ചേരുന്ന ജനറല്‍ ബോഡി യോഗത്തിന് ശേഷം തീരുമാനിക്കും.

കഴിഞ്ഞ യോഗത്തില്‍ ചര്‍ച്ചയില്‍ ഏര്‍പ്പെട്ട അതേ സംഘത്തോടാണ് വൈകിട്ട് 4.45ന് മുഖ്യമന്ത്രിയുടെ വസതിയില്‍ എത്താന്‍ ആവശ്യപ്പെട്ടത്. വിഷയം രാജ്യത്തിന്റെ പരമോന്നത കോടതിയില്‍ ഉള്ളതിനാല്‍ ചര്‍ച്ചയുടെ തത്സമയ സംപ്രേക്ഷണമോ വിഡിയോ ചിത്രീകരണമോ ഉണ്ടാകില്ലെന്നും പകരം മിനിറ്റ്‌സ് രേഖപ്പെടുത്തുമെന്നും കത്തില്‍ പറയുന്നു.