ന്യൂഡല്‍ഹി: ഹേമ കമ്മിറ്റി റിപ്പോര്‍ട്ടില്‍ നിലപാട് കടുപ്പിച്ച് ദേശീയ വനിതാ കമ്മിഷന്‍. റിപ്പോര്‍ട്ടിന്റെ പൂര്‍ണരൂപം ദേശീയ വനിതാ കമ്മിഷന് കൈമാറണമെന്ന നിര്‍ദ്ദേശം കേരള സര്‍ക്കാര്‍ പാലിച്ചില്ല. റിപ്പോര്‍ട്ട് നല്‍കണമെന്നാവശ്യപ്പെട്ട് ചീഫ് സെക്രട്ടറിക്ക് നല്‍കിയ കത്തിനും മറുപടി ലഭിച്ചിട്ടില്ല. 

ഇതിന്റെ പശ്ചാത്തലത്തില്‍ കേരളം സന്ദര്‍ശിക്കാനുള്ള തയാറെടുപ്പിലാണ് ദേശീയ വനിതാ കമ്മിഷന്‍. ഹേമ കമ്മിറ്റിക്കു മുന്നില്‍ മൊഴി നല്‍കിയവരെ കാണും. മൊഴികളുടെ അടിസ്ഥാനത്തില്‍ തുടര്‍നടപടിയെടുക്കുമെന്നാണ് സൂചന.

രണ്ടോ മൂന്നോ അംഗങ്ങളുടെ സംഘമാണ് കേരളം സന്ദര്‍ശിക്കുക. എന്നാല്‍, എപ്പോള്‍ സന്ദര്‍ശിക്കുമെന്ന് കമ്മിഷന്‍ വ്യക്തമാക്കിയിട്ടില്ല.

ഓഗസ്റ്റ് 30നാണ് വനിതാ കമ്മിഷന്‍ കത്ത് അയച്ചത്. ഒരാഴ്ചയ്ക്കകം റിപ്പോര്‍ട്ട് ലഭ്യമാക്കാനാണ് സംസ്ഥാന സര്‍ക്കാരിനോട് ആവശ്യപ്പെട്ടിരുന്നത്. എന്നാല്‍ കമ്മിഷന്‍ നിര്‍ദേശിച്ചിട്ടും സംസ്ഥാന ചീഫ് സെക്രട്ടറി മറുപടി പോലും നല്‍കിയില്ല എന്നാണ് ദേശീയ വനിതാ കമ്മിഷന്‍ പറയുന്നത്.