കോഴിക്കോട്: പാലക്കാട്ടെ പാതിരാ റെയ്ഡ് വനിതാ കോണ്‍ഗ്രസ് നേതാക്കളെ മനഃപൂര്‍വം അപമാനിക്കാനായിരുന്നുവെന്ന് യു.ഡി.എഫ് കണ്‍വീനര്‍ എം.എം ഹസന്‍. ഹേമ കമ്മിറ്റി പറഞ്ഞ കതകില്‍ മുട്ടുന്ന ജോലി പിണറായി പൊലിസ് ഏറ്റെടുത്തു. അര്‍ധരാത്രിയില്‍ ഒറ്റയ്ക്ക് താമസിക്കുന്ന വനിതാ നേതാക്കളുടെ മുറിയിലേക്ക് ചെന്ന് മുട്ടുന്നതെന്തിനാണ്. ഇത് നിസാരമായി കാണാന്‍ കഴിയുന്ന ഒന്നല്ല. യൂണിഫോമും ഐഡന്റിറ്റി കാര്‍ഡും ഇല്ലാതെയാണ് പിണറായി പൊലീസ് വനിതാ നേതാക്കളുടെ കതകില്‍ മുട്ടിയത്. 

വനിതാ പൊലിസ് എത്തിയപ്പോഴാണ് ഷാനിമോള്‍ ഉസ്മാന്‍ മുറിയിലെ വാതില്‍ തുറന്നു കൊടുത്തിരുന്നത്. പാതിരാ പരിശോധനയ്ക്ക് പിന്നില്‍ മന്ത്രി എം.ബി രാജേഷ് ആണെന്നും മന്ത്രി രാജിവയ്ക്കണമെന്നും ഹസന്‍ ആവശ്യപ്പെട്ടു. വനിതാ നേതാക്കളെ അപമാനിച്ച പൊലിസുകാരെ സസ്പെന്‍ഡ് ചെയ്യണം. പനമ്പായയില്‍ നോട്ടുകെട്ടുകള്‍ കൊണ്ടുപോയ പാരമ്പര്യം കോണ്‍ഗ്രസിന്റേതല്ല. 

പൊലിസ് എന്തുകൊണ്ട് പി.കെ ശ്രീമതിയുടെ മുറി പരിശോധിച്ചില്ല. മുഖ്യമന്ത്രിയുടെ ഓഫിസിലെ ഉപജാപകസംഘത്തിന്റെ നിര്‍ദേശപ്രകാരമാണ് മന്ത്രി എം.ബി രാജേഷ് പ്രവര്‍ത്തിക്കുന്നത്. ഇതാണ് പിണറായി പൊലിസിന്റെ ഇപ്പോഴത്തെ അവസ്ഥ. അര്‍ധരാത്രിയില്‍ ഒറ്റയ്ക്ക് താമസിക്കുന്ന വനിതാ നേതാക്കളുടെ മുറിയിലേക്ക് ചെന്ന് മുട്ടുന്നതെന്തിനാണ് ഇത് നിസാരമായി കാണാന്‍ കഴിയുന്ന ഒന്നല്ല. പൊലിസ് ബിന്ദു കൃഷ്ണയുടെ മുറി തള്ളി തുറക്കുകയാണ് ഉണ്ടായത്. 

സംഭവം നടന്ന ഉടനെ അവിടേക്ക് എങ്ങിനെയാണ് കൃത്യ സമയത്ത് സി.പി.എം, ബി.ജെ.പി പ്രവര്‍ത്തകര്‍ എത്തിയത്. പരിശോധന ബി.ജെ.പി - സി.പി.എം ഡീലാണെന്നും തികച്ചും ആസൂത്രിതമായ സംഭവമാണിതെന്നും ഹസന്‍ മാധ്യമങ്ങളോട് പറഞ്ഞു.