കല്‍പ്പറ്റ: വയനാട് ഉപതെരഞ്ഞെടുപ്പില്‍ ഇതുവരെ എണ്ണിയ എല്ലാ റൗണ്ടിലും പ്രിയങ്കയ്ക്ക് രാഹുലിന് കിട്ടിയതിനേക്കാള്‍ ലീഡ്. പ്രിയങ്കയുടെ ലീഡ് മൂന്ന് ലക്ഷം കഴിഞ്ഞു. 312876 വോട്ടിന്റെ ലീഡാണ് വയനാട്ടില്‍ പ്രിയങ്ക ഗാന്ധിക്കുള്ളത്. 

സത്യന്‍ മൊകേരിക്കു ഓരോ റൗണ്ടിലും ശരാശരി 3000 വോട്ടുകളുടെ കുറവ് ഉണ്ടായപ്പോള്‍ നവ്യക്ക് ഓരോ റൗണ്ടിലും ശരാശരി 2000 വോട്ടുകളുടെ കുറവും ഉണ്ടായി. 

രാഹുലിന്റെ  ഭൂരിപക്ഷം പ്രിയങ്കയ്ക്ക് നിലനിര്‍ത്താന്‍ കഴിയുമോ എന്ന് യു.ഡി.എഫിന് ആശങ്കയുണ്ടായിരുന്നെങ്കിലും അതിനെയെല്ലാം നിഷ്പ്രഭമാക്കുന്ന വാര്‍ത്തകളാണ് വരുന്നത്. വോട്ടെണ്ണലിന്റെ തുടക്കം മുതല്‍ തന്നെ ഏഴ് നിയമസഭ മണ്ഡലങ്ങളിലും പ്രിയങ്കയാണ് മുന്നേറുന്നത്.

പോള്‍ചെയ്തതില്‍ 70 ശതമാനം വോട്ടും പ്രിയങ്ക നേടുന്ന രീതിയാണ് വോട്ടെണ്ണലില്‍ തെളിയുന്നത്. പ്രിയങ്കയെയും രാഹുലിനെയും കടന്നാക്രമിച്ച് എല്‍.ഡി.എഫ് നടത്തിയ പ്രചാരണങ്ങളൊന്നും വോട്ടര്‍മാര്‍ ഗൗനിച്ചില്ല എന്നതാണ് വോട്ടെണ്ണലില്‍ തെളിയുന്നത്. 

ബി.ജെ.പി സ്ഥാനാര്‍ഥി നവ്യ ഹരിദാസിന് പ്രതീക്ഷിച്ച വോട്ടുകളൊന്നും സമാഹരിക്കാനായിട്ടില്ല.