പേപ്പാറ: വംശനാശ ഭീഷണിയിലായ വെള്ളിമൂങ്ങകളെ പിടികൂടാന്‍നായാട്ട് സംഘങ്ങള്‍ വനത്തിലേക്ക് .
കേരള തമിഴ് നാട് അതിര്‍ത്തി വനത്തിലെ രഹസ്യ വഴികള്‍ താണ്ടിയാണ് ഇവര്‍ കാട്ടില്‍ എത്തിയിരിക്കുന്നത്.
വെള്ളിമൂങ്ങകള്‍ ഭാഗ്യം കൊണ്ടു വരുമെന്ന അന്ധ വിശ്വാസത്തിലാണ് സംഘം അവയെ പിടികൂടാനെത്തിയിരിക്കുന്നത്. വനം വകുപ്പ് വംശനാശം നേരിടുന്ന ജീവികളുടെ ഗണത്തില്‍പ്പെടുത്തിയ ജീവിയാണ് ഇവ. അഗസ്ത്യമലകളിലും പരിസരത്തും വെള്ളിമൂങ്ങകള്‍ ധാരാളമായി കാണപ്പെടുന്നുണ്ട്. ഇവയെ ലക്ഷ്യമിട്ടാണ് കാട്ടുകള്ളന്മാരും ചില നാടോടികലും വനത്തിലേക്ക് കടന്നത്.
പേപ്പാറ, ബോണക്കാട്, പാണ്ടിപ്പത്ത്, ആനനിരത്തി , ചെമ്പകപ്പാറ, കുലശേഖരം എന്നീ സ്ഥലങ്ങളില്‍ ഉള്‍ വനത്തില്‍ കയറാന്‍ രഹസ്യ വഴികളുണ്ട്. ഇതാണ് ഇക്കൂട്ടര്‍ പ്രയോജനപ്പെടുത്തുന്നത്. ഒരു വെള്ളിമൂങ്ങക്കു 8 മുതല്‍ പത്തു ലക്ഷം വരെയാണ് വില ലഭിക്കുന്നത്. ഇവയെ വാങ്ങാനും വില്‍ക്കാനുമായി ഓണ്‍ലൈന്‍ സൈററുകള്‍ പോലും പ്രവര്‍ത്തിക്കുന്നുണ്ട്. വനപാലകര്‍ ജാഗ്രത പാലിച്ചില്ലെങ്കില്‍ സംസ്ഥാനത്തിന്റെ ജൈവ സമ്പത്തിന്റെ പ്രതീകങ്ങളില്‍ ഒന്നു കൂടി പൂര്‍ണമായി ഇല്ലാതാകും.