കൊച്ചി: കേരള സാങ്കേതിക സർവകലാശാല വൈസ് ചാൻസലറായി പ്രൊഫ. കെ ശിവപ്രസാദിനെ നിയമിച്ച ​ഗവർണറുടെ നടപടി സ്റ്റേ ചെയ്യാൻ വിസമ്മതിച്ച് ഹൈക്കോടതി.സംസ്ഥാന സർക്കാർ ഗവർണറുടെ നടപടി ചോദ്യം ചെയ്ത്  നൽകിയ ഹർജി ഫയലിൽ സ്വീകരിച്ച കോടതി പ്രൊഫ. കെ ശിവപ്രസാദിനു നോട്ടീസ് അയച്ചു.

സർക്കാർ പട്ടികയിൽ നിന്നു നിയമനം വേണമെന്ന സർവകലാശാല ചട്ടം ​ഗവർണർ ലംഘിച്ചെന്നായിരുന്നു സർക്കാർ ഉന്നയിച്ച വാദം. എന്നാൽ ഈ പാനലിൽ യോ​ഗ്യത ഉള്ളവർ ഉണ്ടായിരുന്നില്ലെന്നും സർവകലാശാലയിലെ ഭരണ സ്തംഭനാവസ്ഥ ഒഴിവാക്കാനാണ് താത്കാലിക ചുമതല നൽകി യോ​ഗ്യത ഉള്ള ആളെ നിയമിച്ചതെന്നും ​ഗവർണർ കോടതിയെ അറിയിച്ചത്.

വൈസ് ചാൻസലർ ഇല്ലാത്ത സാഹചര്യം അനുവദിക്കാനാകില്ലെന്നു കോടതി നിരീക്ഷിച്ചു. ജസ്റ്റിസ് സിയാദ് റഹ്മാനാണ് സ്റ്റേ ആവശ്യം നിരസിച്ചത്.
വിസിയുടെ ചുമതല വഹിച്ചിരുന്ന ഡിജിറ്റൽ വിസി ഡോ. സജി ​ഗോപിനാഥ് കാലാവധി പൂർത്തിയാക്കിയതോടെയാണ് പ്രൊഫ. കെ ശിവപ്രസാദിനു ചുമതല നൽകിയത്. ഡോ. സജി ​ഗോപിനാഥ്, സാങ്കേതിക വിദ്യാഭ്യാസ ഡയറക്ടർ ഡോ. പിആർ ഷാലിജ്, ഡോ. വിനോദ് കുമാർ ജേക്കബ് എന്നിവരുടെ പാനലാണ് സർക്കാർ നൽകിയിരുന്നത്.