റിയാദ്: റിയാദ് മെട്രോ സര്‍വിസിന് തുടക്കം. ആദ്യ ഘട്ടത്തില്‍ മൂന്ന് ലൈനുകളിൽ ട്രെയിനുകള്‍ ഓടിത്തുടങ്ങി. വര്‍ഷങ്ങളായി തലസ്ഥാന നഗരവാസികള്‍ കാത്തിരുന്ന റിയാദ് മെട്രോ ഇന്ന് അതിരാവിലെ പ്ലാറ്റ്‌ഫോമുകള്‍ തുറന്നതായി റിയാദ് സിറ്റി റോയല്‍ കമ്മീഷന്‍ അറിയിച്ചു. ആറു പാതകളില്‍ മൂന്നെണ്ണത്തില്‍ മാത്രമാണ് ഇന്ന് സര്‍വീസ് ആരംഭിച്ചത്. മെട്രോ യാത്ര അനുഭവിച്ചറിയുന്നതിനായി പലരും ഇന്ന് വിവിധ സ്റ്റേഷനുകളില്‍ നിന്ന് യാത്ര നടത്തി. ഉലയ്യയയില്‍ നിന്ന് ബത്ഹ വരെയെത്താന്‍ ഒമ്പത് മിനുട്ട് മാത്രമാണ് എടുക്കുന്നത്. അതേസമയം ബത്ഹ സ്റ്റേഷന്‍ രാവിലെ തുറന്നില്ല, പകരം മന്‍ഫൂഹ സ്റ്റേഷനാണ് തുറന്നത്. ഇത് ദാറുല്‍ ബൈദ വരെ നീളും.

അത്യാധുനിക സൗകര്യങ്ങളോടെയാണ് ഓരോ സ്‌റ്റേഷനും ഒരുക്കിയിട്ടുള്ളത്. യാത്രക്കാരെ സ്വീകരിക്കുന്നതിനായി ഇവിടെ പ്രത്യേകം ഉദ്യോഗസ്ഥരെ നിയമിച്ചിട്ടുണ്ട്. കാര്‍ഡ് സ്വൈപ് ചെയ്ത് മെട്രോയില്‍ കയറാം. സ്‌റ്റേഷനുകളുടെ പേരുകള്‍ ഡിജിറ്റല്‍ ബോര്‍ഡില്‍ പ്രത്യക്ഷപ്പെടും. കുറഞ്ഞ സമയാണ് സ്റ്റേഷനില്‍ നിര്‍ത്തുന്നത്. അതേസമയം യാത്രയുടെ വീഡിയോയും ചിത്രങ്ങളും സാമൂഹിക മാധ്യമങ്ങളില്‍ ഷെയര്‍ ചെയ്യുന്ന തിരക്കിലാണ് യാത്രക്കാര്‍.

ഒലയ്യ ബത്ഹ റൂട്ടിലെ ബ്ലൂ മെട്രോ, എയര്‍പോര്‍ട്ട് റോഡിലെ യെല്ലോ മെട്രോ, അബ്ദുറഹ്മാന്‍ ബിന്‍ ഔഫ് റൂട്ടിലെ പര്‍പ്പിള്‍ മെട്രോ എന്നിവ ഇന്ന് രാവിലെ സര്‍വീസ് ആരംഭിച്ചു. ബുധനാഴ്ച രാത്രി സല്‍മാന്‍ രാജാവാണ് മെട്രോ ഉദ്ഘാടനം ചെയ്തത്. ഡിസംബര്‍ 15ന് റെഡ്, ഗ്രീന്‍, ഓറഞ്ച് മെട്രോകള്‍ സര്‍വീസ് ആരംഭിക്കും. ടിക്കറ്റുകള്‍ ദര്‍ബ് ആപ്ലിക്കേഷന്‍ വഴിയോ അല്ലെങ്കില്‍ കൗണ്ടര്‍ വഴിയോ എടുക്കാം.

Riyadh Metro has launched a new service, enabling passengers to travel from Olaya to Batha in just 9 minutes. This new route aims to enhance connectivity and reduce travel time within the city.