തിരുവനന്തപുരം: മംഗലപുരത്ത് ഏരിയാ സമ്മേളനത്തിനിടെ ഇറങ്ങിപ്പോയ മുന്‍ സെക്രട്ടറി മധു മുല്ലശേരിയെ പുറത്താക്കി സി.പി.എം. പുറത്താക്കാന്‍ തിരുവനന്തപുരം ജില്ലാ സെക്രട്ടേറിയറ്റിന്റെ ശുപാര്‍ശ പ്രകാരമാണ് നടപടി. മധുവിനെ പുറത്താക്കാന്‍ പാര്‍ട്ടി സംസ്ഥാന കമ്മിറ്റി അനുമതി നല്‍കിയെന്ന് ജില്ലാ സെക്രട്ടറി വി. ജോയ് വ്യക്തമാക്കി. 

മധു മുല്ലശേരിയുടെ നിലപാട് മാധ്യമങ്ങളിലൂടെയാണ് അറിഞ്ഞതെന്ന് ജോയ് പറഞ്ഞു. മധു പാര്‍ട്ടി മൂല്യങ്ങള്‍ സംരക്ഷിച്ചില്ല. പാര്‍ട്ടി തത്വങ്ങള്‍ക്ക് വിരുദ്ധമായി പ്രവര്‍ത്തിച്ചു. പൊതുജന മധ്യത്തില്‍ പാര്‍ട്ടിയെ പരസ്യമായി അവഹേളിച്ചുവെന്നും ജില്ലാകമ്മിറ്റി പുറത്തിറക്കിയ പത്രക്കുറിപ്പില്‍ പറയുന്നു. 

സമ്മേളനത്തില്‍ സെക്രട്ടറിയെ തെരഞ്ഞെടുക്കുന്നതിനു സി.പി.എമ്മിന് അതിന്റേതായ രീതിയുണ്ട്. ഭൂരിപക്ഷം കിട്ടിയ ആളാണ് സെക്രട്ടറിയാകേണ്ടത്. മധു നടത്തുന്നത് അപവാദ പ്രചാരണങ്ങളാണ്. മധു ബി.ജെ.പിയില്‍ പോയാലും കുഴപ്പമില്ല. ഒപ്പം മകന്‍ ഉള്‍പ്പെടെ ആരും പോകില്ലെന്നും ജോയ് പറഞ്ഞു. ജില്ലാ സെക്രട്ടറി വി. ജോയിക്കെതിരായ ആരോപണം മറുപടി അര്‍ഹിക്കാത്തതാണെന്ന് കടകംപള്ളി സുരേന്ദ്രനും പറഞ്ഞു. മധുവിനെതിരേ പാര്‍ട്ടിക്ക് മുന്നിലുള്ള പരാതികളെക്കുറിച്ച് ഇപ്പോള്‍ പറയുന്നില്ലെന്നും കടകംപള്ളി പറഞ്ഞു.

അതേസമയം, എതിര്‍വാ പറഞ്ഞാല്‍ ഉടന്‍ പുറത്താക്കുക എന്നത് കമ്യൂണിസ്റ്റ് പാര്‍ട്ടിയുടെ സ്ഥിരം ശൈലിയാണെന്ന് മധു പ്രതികരിച്ചു.