കണ്ണൂര്‍: തോട്ടട ഗവ. ഐ.ടി.ഐയില്‍ എസ്.എഫ്.ഐ-കെ.എസ്.യു തര്‍ക്കം സംഘര്‍ഷത്തില്‍ കലാശിച്ചു. കെഎസ്യു പ്രവര്‍ത്തകര്‍ ക്യാമ്പസില്‍ കൊടികെട്ടിയതുമായി ബന്ധപ്പെട്ടുണ്ടായ വാക്കുതര്‍ക്കമാണ് സംഘര്‍ഷത്തിലേക്കെത്തിയത്. 

കെ.എസ്.യു പ്രവര്‍ത്തകര്‍ കെട്ടിയ കൊടി എസ്.എഫ്.ഐ പ്രവര്‍ത്തകര്‍ തകര്‍ത്തു. ഇതേചൊല്ലിയാണ് വാക്കുതര്‍ക്കവും കൈയ്യാങ്കളിയുമുണ്ടായത്. 34 വര്‍ഷങ്ങള്‍ക്കു ശേഷമാണ് കണ്ണൂര്‍ തോട്ടട ഐ.ടി.ഐയില്‍ കെ.എസ്.യു യൂണിറ്റ് രൂപീകരിക്കുകയും കൊടിമരം സ്ഥാപിക്കുകയും ചെയ്തത്. 

ക്യാമ്പസിനുളളില്‍ പ്രവര്‍ത്തകര്‍ പരസ്പരം ഏറ്റുമുട്ടി. സംഘര്‍ഷം കനത്തതോടെ പ്രവര്‍ത്തകര്‍ക്ക് നേരെ പൊലീസ് ലാത്തി വീശി.

നിരവധി വിദ്യാര്‍ഥികള്‍ക്ക് പരുക്കേറ്റു. കെ.എസ്.യു യൂണിറ്റ് പ്രസിഡന്റിന് മര്‍ദനമേറ്റു. അബോധാവസ്ഥയിലായ വിദ്യാര്‍ത്ഥിയെ ആശുപത്രിയിലേക്ക് മാറ്റി. ക്യാമ്പസ് അനിശ്ചിത കാലത്തേക്ക് അടച്ചു.