റിയാദ്: മുംബൈയിലെ സഊദി കോണ്‍സുലേറ്റില്‍ ഗാര്‍ഹിക വിസ സ്റ്റാമ്പിങ് പുനരാരംഭിച്ചു. ഒന്നര മാസത്തെ ഇടവേളക്ക് ശേഷമാണ് വിസ സ്റ്റാമ്പിങ് പുനരാരംഭിച്ചിരിക്കുന്നത്. അപ്രതീക്ഷിതമായാണ് ഒന്നര മാസം മുമ്പ് മുംബൈ സഊദി കോണ്‍സുലേറ്റില്‍ വിസ സ്റ്റാമ്പിങ് നിര്‍ത്തിവെച്ചത്. പകരം ന്യൂഡല്‍ഹിയിലെ സഊദി എംബസി വഴിയായിരുന്നു വിസ സ്റ്റാമ്പിങ് നടന്നിരുന്നത്. 

ഇന്ത്യയെ കൂടാതെ പാകിസ്താന്‍, ബംഗ്ലാദേശ് അടക്കം മറ്റു രാജ്യങ്ങളിലേയും സഊദി കോണ്‍സുലേറ്റുകളില്‍ ഇപ്രകാരം ഗാര്‍ഹിക വിസ സ്റ്റാമ്പിങ് നിര്‍ത്തിവെച്ചിരുന്നു. പകരം എല്ലായിടത്തും എംബസികള്‍ വഴി മാത്രമാണ് ഇതു നടന്നിരുന്നത്. ഇക്കാരണത്താല്‍ എംബസികളില്‍ തിരക്കേറുകയും കാലതാമസത്തിന് പുറമെ വിസ സ്റ്റാമ്പിങ് സര്‍വിസ് ചാര്‍ജ് പതിന്മടങ്ങായി വര്‍ധിക്കുകയും ചെയ്തിരുന്നു.