വയനാട് : ആംബുലന്‍സിന് മുന്നില്‍ മാര്‍ഗ തടസ്സം സൃഷ്ടിച്ചു സ്‌കൂട്ടര്‍ ഓടിച്ച സംഭവത്തില്‍ നടപടിയുമായി മോട്ടോര്‍ വാഹന വകുപ്പ് . ആംബുലന്‍സിന് തടസം സൃഷ്ടിച്ച സ്‌കൂട്ടര്‍ കസ്റ്റഡിയില്‍ എടുത്തു. സ്‌കൂട്ടര്‍ ഓടിച്ച കോഴിക്കോട് ചെലവൂര്‍ സ്വദേശി അഫ്‌നസിനോട് ഇന്ന് വൈകിട്ട് ആര്‍.ടി.ഒക്കു മുമ്പില്‍ ഹാജരാകാന്‍ നിര്‍ദേശിച്ചിട്ടുണ്ട്. അഫ്‌നസിന്റെ ലൈസന്‍സും സ്‌കൂട്ടറിന്റെ ആര്‍ സി ബുക്കും കസ്റ്റഡിയില്‍ എടുത്തു. 

ഇന്നലെ രാത്രി 8 ന് വയനാട്ടില്‍ നിന്നുള്ള അടിയന്തര ചികിത്സ നടത്തേണ്ട രോഗിയുമായി കോഴിക്കോട് ഗവ. മെഡിക്കല്‍ കോളജ് ആശുപത്രിയിലേക്ക് വന്ന ആംബുലന്‍സിന് മുന്നില്‍ 9.15 ഓടെയാണ് തടസവുമായി ബൈക്ക് യാത്രികന്‍ എത്തിയത്. അടിവാരം മുതല്‍ കാരന്തൂര്‍ വരെ 22 കിലോമീറ്റര്‍ ദൂരം ആംബുലന്‍സിനെ മറികടക്കാന്‍ അനുവദിക്കാതെ ഇയാള്‍ മുന്നിലുണ്ടായിരുന്നു. ഹോണ്‍ അടിച്ചിട്ടും സൈറണ്‍ മുഴക്കിയിട്ടും ഇയാള്‍ മാറിയില്ല. ആംബുലന്‍സില്‍ ഡ്രൈവര്‍ക്കൊപ്പമുള്ളവരാണ് സ്‌കൂട്ടര്‍ യാത്രക്കാരന്റെ വീഡിയോ ചിത്രീകരിച്ചത്.