ബോർഡർ ഗവാസ്കർ ട്രോഫി അവസാനിച്ചാൽ ഇന്ത്യക്ക് ഇംഗ്ലണ്ടിനെതിരെയാണ് പരമ്പരയുള്ളത്. അഞ്ച് ട്വന്റി ട്വന്റിയും മൂന്ന് ഏകദിനവുമാണ്‌ ഇന്ത്യ ഇംഗ്ലണ്ടിനെതിരെ കളിക്കുക. ഈ പരമ്പരയിൽ ഇന്ത്യൻ താരങ്ങളായ വിരാട് കോഹ്‌ലി, രോഹിത് ശർമ, ജസ്പ്രീത് ബുംറ എന്നിവർക്ക് ഇന്ത്യൻ ക്രിക്കറ്റ്‌ ബോർഡ് വിശ്രമം അനുവദിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. 

ഇതിനു ശേഷം ഇന്ത്യയുടെ മുന്നിലുള്ളത് ചാമ്പ്യൻസ് ട്രോഫിയാണ്. അതുകൊണ്ട് തന്നെ മറ്റൊരു മേജർ ടൂർണമെന്റ് മുന്നിലെത്തുമ്പോൾ ഇന്ത്യൻ നിരയിലെ പ്രധാന താരങ്ങളുടെ ജോലി ഭാരം കുറയ്ക്കാനാവും ഇന്ത്യൻ ക്രിക്കറ്റ് ബോർഡ് ലക്ഷ്യം വെക്കുക.

ഇംഗ്ലണ്ടിനെതിരെയുള്ള ട്വന്റി ട്വന്റി പരമ്പര ജനുവരി 22 മുതൽ ഫെബ്രുവരി രണ്ട് വരെയാണ് നടക്കുക. ഏകദിന പരമ്പര ഫെബ്രുവരി ആറ് മുതൽ  ഫെബ്രുവരി 12  വരെയുമാണ് നടക്കുക. ചാമ്പ്യൻസ് ട്രോഫിയിൽ ഗ്രൂപ്പ് എയിൽ ആണ് ഇന്ത്യ ഉള്ളത്. ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഇന്ത്യക്കൊപ്പം ഉള്ളത്. ഗ്രൂപ്പ് ബിയിൽ ഓസ്‌ട്രേലിയ, ഇംഗ്ലണ്ട്, അഫ്ഗാനിസ്ഥാൻ, ദക്ഷിണാഫ്രിക്ക എന്നീ ടീമുകളുമാണ് ഉള്ളത്.

നിലവിൽ ഓസ്‌ട്രേലിയക്കെതിരായ അവസാന മത്സരത്തിനുള്ള തയ്യാറെടുപ്പിലാണ് ഇന്ത്യൻ ടീം. അവസാന മത്സരം ജനുവരി മൂന്ന് മുതൽ ഏഴു വരെയാണ് നടക്കുക. നിലവിൽ നാല് മത്സരങ്ങൾ പിന്നിട്ടപ്പോൾ പരമ്പരയിൽ 2-1ന് മുന്നിലാണ് ഓസ്‌ട്രേലിയ. സിഡ്‌നിയിൽ നടക്കുന്ന മത്സരത്തിൽ വിജയം ആവർത്തിക്കാൻ തന്നെയായിരിക്കും ഓസീസ് ലക്ഷ്യം വെക്കുക.