വയനാട്: വയനാട്ടിൽ കടുവ ആക്രമണം. പുൽപള്ളിയിൽ ഇറങ്ങിയ കടുവ പ്രദേശത്തെ ആടിനെ കടിച്ചുകൊന്നു. ഊട്ടിക്കവലയിൽ ബിജുവിന്റെ ആടിനെയാണ് കടുവ കൊന്നത്. പുലർച്ചെ രണ്ട് മണിയോട് കൂടിയാണ് ആക്രമണം നടന്നത്. സംഭവം കണ്ട് വീട്ടുകാർ ബഹളം വെക്കുകയായിരുന്നു. ഇതോടെ കടുവ ആടിനെ ഉപേക്ഷിച്ച് പോവുകയായിരുന്നു. വനംവകുപ്പ് സ്ഥലത്തെത്തി പരിശോധന നടത്തുകയും ചെയ്തു.  

നിലവിൽ ആടിനെ ലക്ഷ്യം വെക്കുന്ന കടുവയ്ക്ക് വേണ്ടിയുള്ള തെരച്ചിൽ തുടരുകയാണ്. ജനുവരി 7, 9, 13, തീയതികളിൽ ആയിരുന്നു കടുവയുടെ ആക്രമണം ഇവിടെ ഉണ്ടായത്. അവസാനമായി ആക്രമണം നടത്തിയ ആടിനെ കടുവയ്ക്ക് തിന്നാൻ കഴിഞ്ഞിട്ടില്ല.

അതുകൊണ്ട് തന്നെ കടുവ വീണ്ടും എത്തുമെന്നാണ് പ്രതീക്ഷിക്കുന്നത്. കടുവ കൂട്ടിൽ ആകുന്നതിന് കാക്കാതെ, കടുവയെ മയക്കുവെടി വെച്ച് പിടിക്കണമെന്നാണ് നാട്ടുകാർ ഉന്നയിക്കുന്ന ആവശ്യം. കടുവ ഇനിയും വളർത്ത് മൃഗങ്ങളെ പിടികൂടുകയാണെങ്കിൽ പ്രദേശത്ത് നാട്ടുകാർ വലിയ പ്രതിഷേധം നടത്താനുള്ള സാധ്യതകളും നിലനിൽക്കുന്നുണ്ട്.