ഷാർജ: കെട്ടിടവാടക വർധന നിയന്ത്രിക്കാനും വാടകക്കാരും കെട്ടിട ഉടമകളും തമ്മിലുള്ള തർക്കം കുറയ്ക്കാനും ലക്ഷ്യമിട്ട് വാടക സൂചിക ഏർപ്പെടുത്താൻ ഒരുങ്ങി ഷാർജ. ദുബൈ, അബൂദബി എമിറേറ്റുകൾക്കു പിന്നാലെ വാടക സൂചിക കൊണ്ടുവരുന്ന മൂന്നാമത്തെ എമിറേറ്റാകും ഷാർജ. ഭാവിയിൽ മറ്റു എമിറേറ്റുകളും ഇതു പിന്തുടരാൻ സാധ്യതയുണ്ട്.

ഓരോ പ്രദേശത്തിൻ്റെയും പ്രാധാന്യവും വിപണി നിലവാരവും ജനസാന്ദ്രതയും കണക്കാക്കി വാടകപരിധി നിശ്ചയിക്കുന്നത് വാടകനിരക്കും പരാതികളുടെ എണ്ണവും കുറക്കാൻ സഹായിക്കുമെന്നാണ് കണക്കാക്കുന്നത്. ഇതിനു മുന്നോടിയായി ഷാർജയിലെ പഴയതും പുതിയതുമായ കെട്ടിടങ്ങൾ തരംതിരിക്കും. ഓരോ പ്രദേശത്തെയും വാടക നിലവാരം ജനങ്ങൾക്ക് മനസിലാക്കാൻ കഴിയുന്ന തരത്തിലാണ് ഷാർജ റെന്റൽ ഇൻഡക്സ് തയാറാക്കുക. റിയൽ എസ്‌റ്റേറ്റ് വിപണിയിൽ കൂടുതൽ സുതാര്യതക്കും, നിക്ഷേപകർക്കിടയിൽ ആത്മവിശ്വാസം വർധിപ്പിക്കാനും വാടക സൂചികയിലൂടെ കഴിയുമെന്ന് വിലയിരുത്തപ്പെടുന്നു.

ഷാർജ റിയൽ എസ്‌റ്റേറ്റ് വകുപ്പുമായി സഹകരിച്ചായിരിക്കും വാടക സൂചിക പുറത്തിറക്കുകയെന്ന് ഷാർജ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയിലെ റിയൽ എസ്‌റ്റേറ്റ് ബിസിനസ് ഗ്രൂപ്പ് സമിതി ചെയർമാൻ സഈദ് ഗനീം അൽ സുവൈദി അറിയിച്ചു. ജനുവരി 22ന് ഷാർജ എക്സസ്പോ സെന്ററിൽ നടക്കുന്ന എക്സിബിഷനിൽ വാടക സൂചിക പുറത്തിറക്കാനാണ് പദ്ധതിയിടുന്നത്. വാടക വർധനയ്ക്ക് കടിഞ്ഞാണിട്ട് 2024 ഓഗസ്റ്റിൽ അബൂദബിയിലും ഈ മാസമാദ്യം ദുബൈയിലും വാടക സൂചിക ആരംഭിച്ചിരുന്നു.

ദുബൈയിലെ വാടക വർധനയിൽനിന്ന് രക്ഷപ്പെടാൻ ഷാർജ, അജ്‌മാൻ, ഉമ്മുൽഖുവൈൻ എന്നിവിടങ്ങളിലാണ് പലരും താമസിക്കുന്നത്. അതിർത്തി പ്രദേശമായ അൽനഹ്‌ദ, അൽവഹ്ദ ഭാഗങ്ങളിലെ വാടക ദുബൈയിലേതിനെക്കാൾ വലിയ വ്യത്യാസമില്ലാതാകുകയും ഷാർജയിലേക്കുള്ള ഗതാഗതക്കുരുക്ക് വർധിക്കുകയും ചെയ്‌തതോടെ പലരും ദുബൈയിലേക്കു താമസം മാറ്റിയിരുന്നു. പുതിയ റെൻ്റൽ ഇൻഡെക്‌സിലൂടെ വാടക കുറഞ്ഞാൽ ദുബൈയിൽനിന്ന് ഷാർജയിലേക്ക് താമസക്കാരുടെ ഒഴുക്കു കൂടും. പകരം വാടക വർധിച്ചാൽ ദുബൈയിലേക്കു തിരിച്ചുപോക്കുമുണ്ടാകും.

Sharjah has launched a rental index aimed at reducing disputes between tenants and landlords, providing a standardized reference point for rental prices and promoting transparency in the rental market.