മുംബൈ: ചാമ്പ്യൻസ് ട്രോഫി പോരാട്ടങ്ങൾക്കുള്ള ഇന്ത്യൻ ടീമിൽ മലയാളി താരം സഞ്ജു സാംസണിന് ഇടം നേടാൻ സാധിച്ചിരുന്നില്ല. വിക്കറ്റ് കീപ്പറായി റിഷബ് പന്താണ് തെരഞ്ഞെടുക്കപ്പെട്ടത്. ഇപ്പോൾ സഞ്ജുവിനെ ടീമിൽ എടുക്കാത്തതിനെക്കുറിച്ച് പറഞ്ഞിരിക്കുകയാണ് മുൻ ഇന്ത്യൻ താരമായ സുനിൽ ഗവാസ്കർ. ഇന്ത്യ ടുഡേയ്ക്ക് നൽകിയ അഭിമുഖത്തിലാണ് ഗവാസ്കർ ഇക്കാര്യം പറഞ്ഞത്.

'ഇത് വളരെ കഠിനമാണ്. സഞ്ജു സെഞ്ച്വറികൾ നേടിയിട്ടുണ്ട്. എന്നിട്ടും അവനെ ടീമിൽ എടുത്തില്ല. ഒരു കളി മാറ്റിമറിക്കാൻ കഴിയുന്ന റിഷബ് പന്തിനെതിരെയാണ് സഞ്ജു മത്സരിച്ചത്. അദ്ദേഹം ഒരു മികച്ച വിക്കറ്റ് കീപ്പറാണ്. സാംസണേക്കാൾ അല്പം കൂടി കളിയുടെ ഗതി  മാറ്റാൻ പന്തിന് കഴിയും. അതാണ് സഞ്ജുവിന് ഇന്ത്യൻ ടീമിൽ ഇടം നഷ്ടമാവാൻ കാരണമായത്. എന്നാൽ ഇതിൽ സാംസൺ നിരാശനാകരുത്,' സുനിൽ ഗവാസ്കർ പറഞ്ഞു. 

ഏകദിനത്തിൽ മികച്ച ബാറ്റിംഗ് റെക്കോർഡാണ് സഞ്ജുവിനുള്ളത്.  56.66 ശരാശരിയിൽ 510 റൺസാണ് മലയാളി താരം നേടിയിട്ടുള്ളത്. ഇതിൽ ഒരു സെഞ്ച്വറിയും മൂന്ന് അർധ സെഞ്ച്വറികളുമാണ് താരം നേടിയിട്ടുള്ളത്. ഇന്ത്യക്കായി ഏകദിനത്തിൽ അവസാനം കളിച്ച മത്സരത്തിലാണ് സഞ്ജു സെഞ്ച്വറി നേടിയത്. ചാമ്പ്യൻസ് ട്രോഫിക്കുള്ള ടീമിൽ ഇടം നേടാൻ സാധിച്ചില്ലെങ്കിലും ഇംഗ്ലണ്ടിനെതിരെയുള്ള അഞ്ചു ട്വന്റി ട്വന്റി മത്സരങ്ങളുടെ പരമ്പരയിൽ സഞ്ജു ഇടം നേടിയിട്ടുണ്ട്. 

ഇന്ത്യൻ ടീമിനൊപ്പം ട്വന്റി ട്വന്റിയിൽ ഓപ്പണർ എന്ന നിലയിൽ സഞ്ജു മികച്ച പ്രകടനങ്ങളാണ് നടത്തിക്കൊണ്ടിരിക്കുന്നത്. ബംഗ്ലാദേശിനെതിരെയുള്ള പരമ്പരയിൽ സഞ്ജു തന്റെ ആദ്യ ടി-20 ഇന്റർനാഷണൽ സെഞ്ച്വറി നേടിയിരുന്നു. പിന്നീട് സൗത്ത് ആഫ്രിക്കക്കെതിരെ നടന്ന ടി-20 പരമ്പരയിൽ രണ്ട് സെഞ്ച്വറികൾ നേടിയും സഞ്ജു തിളങ്ങി.