ദോഹ: ഡ്രോൺ ഉപയോഗം സംബന്ധിച്ച മാർഗനിർദേശങ്ങൾ ഉൾപ്പെടുന്ന കരട് നിയമത്തിന് അംഗീകാരം നൽകി ഖത്തർ മന്ത്രിസഭ. പുതിയ നിർദേശത്തിലൂടെ ലക്ഷ്യം വയ്ക്കുന്നത് വ്യോമഗതാഗത സുരക്ഷ, പൊതുജനങ്ങളുടെ ജീവനും സ്വത്തിനും സംരക്ഷണം എന്നിവ ഉറപ്പാക്കുന്നതിൻ്റെ ഭാഗമായി ഡ്രോൺ ഉപയോഗത്തിൽ നിയമചട്ടക്കൂട് നിർമിക്കുന്നതാണ്. പ്രധാനമന്ത്രിയും വിദേശകാര്യമന്ത്രിയുമായ ശൈഖ് മുഹമ്മദ് ബിൻ അബ്‌ദുൽറഹ്‌മാൻ ആൽഥാനിയുടെ അധ്യക്ഷതയിൽ ചേർന്ന യോഗത്തിലാണ് ഇതുൾപ്പെടെയുള്ള വിവിധ നിർദേശങ്ങളിൽ തീരുമാനമെടുത്തത്.

ബന്ധപ്പെട്ട അധികാരികളുടെ ചുമതലകളും ഉത്തരവാദിത്തങ്ങളും നിർവചിക്കുക, ഈ മേഖലയിലെ നവീകരണവും നിക്ഷേപവും സജീവമാക്കുക, ഉപയോഗം ആവശ്യമാണെന്ന് ഉറപ്പാക്കുക, തുടങ്ങിയവയും പുതിയ കരട് നിയമനിർദേശത്തിൽ ഉൾപ്പെടുന്നതാണ്. മന്ത്രിസഭ അംഗീകരിച്ച നിയമം തുടർനടപടികൾക്കായി ശൂറാ കൗൺസിലിന് കൈമാറി. രാജ്യത്തിൻ്റെ ടൂറിസം മേഖലയിലെ കുതിപ്പിന് വഴിയൊരുക്കുന്ന ശ്രദ്ധേയമായ നിർദേശങ്ങൾക്കും മന്ത്രിസഭാ യോഗം തത്വത്തിൽ അംഗീകാരം നൽകി.

വിനോദ സഞ്ചാരികളെ ആകർഷിക്കുന്ന പുരാവസ്തു, ചരിത്ര, പ്രകൃതി, കാലാവസ്‌ഥ, പാരിസ്‌ഥിതിക സവിശേഷതകളുള്ള മേഖലകളെ വേർതിരിക്കുന്നത് സംബന്ധിച്ച കരട് നിർദേശത്തിനാണ് അംഗീകാരം നൽകിയത്‌. സ്‌ഥലങ്ങളുടെ സവിശേഷത വിലയിരുത്തി ഓരോ പ്രദേശത്തിനും അനുയോജ്യമായ വിനോസഞ്ചാര കേന്ദ്രമാക്കി തരംതിരിക്കാൻ ഇത് അനുവാദം നൽകുന്നു. ഖത്തറിൻ്റെ വിനോദ സഞ്ചാരം രാജ്യാന്തര ഭൂപടത്തിൽ ശ്രദ്ധേയമാക്കി മാറ്റുകയാണ് ഈ നിർദേശങ്ങൾ വഴി ലക്ഷ്യം.

Qatar's cabinet has approved a draft law outlining guidelines for drone usage, marking a significant step towards regulating the use of drones in the country.