തൻ്റെ ബാല്യകാല ക്ലബ്ബായ സ്പോർട്ടിങ്ങിലേക്ക് തിരിച്ചുവപോവാനുള്ള സാധ്യതയെക്കുറിച്ച് സംസാരിക്കുകയാണ് സൂപ്പർ താരം ക്രിസ്റ്റ്യാനോ റൊണാൾഡോ. ദി നസർ സോണിന്‌ നൽകിയ അഭിമുഖത്തിലാണ് റൊണാൾഡോ ഇക്കാര്യം പറഞ്ഞത്. അൽ നാസറിൽ നിന്നും സ്പോർട്ടിങ്ങിലേക്ക് തിരിച്ചുപോവാൻ തനിക്ക് ഉദ്ദേശ്യമില്ലെന്നാണ് റൊണാൾഡോ പറഞ്ഞത്. 

'സ്പോർട്ടിങ്ങിലേക്ക് തിരിച്ചു പോവില്ല. അത് അർത്ഥശൂന്യമാണെന്ന് ഞാൻ കരുതുന്നു. എന്റെ ഫുട്ബോൾ കരിയർ ആരംഭിച്ചത് പോർച്ചുഗലിൽ നിന്നാണ്. എന്നാൽ ഇപ്പോൾ ഞാനിത് പറയുന്നത് പോർച്ചുഗീസ് ഫുട്ബോൾ എനിക്ക് ഇഷ്ടമില്ലാത്തതുകൊണ്ടോ അവിടെ ഗുണനിലവാരമില്ലെന്ന് കരുതുന്നതുകൊണ്ടോയല്ല. എല്ലാത്തിനും ഒരു പരിധിയും സമയവും ഉണ്ടെന്ന് ഞാൻ കരുതുന്നു. സത്യസന്ധമായി പറഞ്ഞാൽ ഞാൻ ഒരിക്കലും ഇതിനെക്കുറിച്ച് ചിന്തിച്ചിട്ടില്ല,' റൊണാൾഡോ പറഞ്ഞു. 

റൊണാൾഡോ എന്ന ഇതിഹാസത്തിന്റെ പിറവി സ്പോർട്ടിങ്ങിലൂടെയായിരുന്നു. പോർച്ചുഗീസ് ക്ലബിനൊപ്പം 31 മത്സരങ്ങളിൽ നിന്നും അഞ്ച് ഗോളുകൾ നേടുകയും ആറ് അസിസ്റ്റുകളുമാണ് താരം നേടിയത്. സ്പോർട്ടിങ്ങിൽ നിന്നും 2003ലാണ് റൊണാൾഡോ മാഞ്ചസ്റ്റർ യുണൈറ്റഡിൽ എത്തിയത്.

12 മില്യൺ പൗണ്ടിനായിരുന്നു റൊണാൾഡോ ഓൾഡ് ട്രാഫോർഡിൽ എത്തിയത്. ഈ കാലങ്ങളിൽ ഇംഗ്ലീഷ് പ്രീമിയർ ലീഗിൽ കളിക്കുന്ന ഒരു യുവതാരത്തിന് ലഭിക്കുന്ന റെക്കോർഡ് തുകയായിരുന്നു ഇത്. മാഞ്ചസ്റ്റർ യുണൈറ്റഡിന്റെ ഇതിഹാസ പരിശീലകൻ സർ അലക്‌സ് ഫെർഗൂസൻ്റെ കീഴിൽ റൊണാൾഡോ ഫുട്ബോളിലെ ഏറ്റവും മികച്ച താരമായി സ്വയം അടയാളപ്പെടുത്തുകയായിരുന്നു.

ഓൾഡ് ട്രാഫോർഡിൽ ആറ് സീസണുകൾ പന്തുതട്ടിയ റൊണാൾഡോ 2009ൽ റൊണാൾഡോ മാഞ്ചസ്റ്റർ യുണൈറ്റഡ് വിട്ട് റയൽ മാഡ്രിഡിലേക്കും അവിടെ നിന്നും 2018ൽ യുവന്റസിലേക്കും കൂടുമാറുകയായിരുന്നു. 2021ൽ റൊണാൾഡോ വീണ്ടും തന്റെ പഴയ തട്ടകമായ മാഞ്ചസ്റ്റർ യുണൈറ്റഡിലേക്ക് മടങ്ങി എത്തിയിരുന്നു. പിന്നീട് 2023ൽ റൊണാൾഡോ സഊദി ക്ലബായ അൽ നസറിലേക്കും ചേക്കേറുകയായിരുന്നു.