റിയാദ്: 2025ലെ റമദാന്‍ ആരദംഭിക്കാന്‍ ഇനി വെറും രണ്ടോ മൂന്നോ ആഴ്ചകള്‍ മാത്രമേ ബാക്കിയുള്ളൂ. പരിശുദ്ധിയുടെ പുതുനാമ്പുകള്‍ തേടി വിശ്വാസികള്‍ വിശുദ്ധ മക്കയിലേക്ക് ഇതിനകം തന്നെ ഒഴുകിത്തുടങ്ങിയിട്ടുണ്ട്. റമദാന്‍ മാസത്തില്‍ സഊദിയില്‍ മിതമായ കാലാവസ്ഥയായിരിക്കുമെന്ന് സഊദി കാലാവസ്ഥാ നിരീക്ഷകര്‍.

ഈ വര്‍ഷത്തെ റമദാനോട് അനുബന്ധിച്ച് സഊദിയില്‍ മൊത്തത്തില്‍ മിതമായ കാലാവസ്ഥ ആയിരിക്കുമെന്നും വടക്കന്‍ പ്രദേശങ്ങളില്‍ തണുത്ത താപനില ഉണ്ടാകുമെന്നും സഊദി അറേബ്യന്‍ സെന്റര്‍ ഫോര്‍ മെറ്റീരിയോളജിയിലെ കാലാവസ്ഥാ വിശകലന വിദഗ്ധനായ അഖീല്‍ അല്‍ ഹല ഒരു ചാനലിനു നല്‍കിയ അഭിമുഖത്തില്‍ പറഞ്ഞു.

ഹിജ്‌റ കലണ്ടറിലെ ഒമ്പതാം മാസമായ റമദാന്‍ ലോകമെമ്പാടുള്ള മുസ്ലിംകളെ സംബന്ധിച്ച് ഏറ്റവും പുണ്യമേറിയ മാസമാണ്. ചാന്ദ്ര അയനം മുന്‍നിര്‍ത്തി മാര്‍ച്ച് ഒന്നിന് റമദാന്‍ ആരംഭിക്കുമെന്നാണ് ഇപ്പോള്‍ കണക്കാക്കപ്പെടുന്നത്. എന്നിരുന്നാലും ഇതൊരു സാധ്യത മാത്രമാണ്. ചന്ദ്രനെ ദര്‍ശിച്ച് ബന്ധപ്പെട്ടവരില്‍ നിന്നും അറിഞ്ഞ ശേഷം മാത്രമേ ഇതില്‍ അന്തിമ തീരുമാനം ഉണ്ടാകൂ. റമദാന്‍ സാധാരണയായി തിരക്കേറിയ ഉംറ സീസണ്‍ ആയിരിക്കും. മിതമായ കാലാവസ്ഥ ഇവര്‍ക്ക് ആശ്വാസം പകരുമെന്നാണ് കരുതപ്പെടുന്നത്.

Moderate weather is likely in Saudi Arabia during Ramadan